قازاقستان عارىشكەرلەر مەن عالىمدار باس قوسقان حالىقارالىق كونگرەسكە قاتىستى

عارىش زەرتتەۋشىلەرى قاۋىمداستىعى ۇيىمداستىرعان حالىقارالىق كونگرەسس تۇركيانىڭ بۋرسا قالاسىندا 25-29 قىركۇيەك ارالىعىندا ءوتتى. ءىس-شارانى گەكمەن اۆياتسيالىق وقۋ ورتالىعى (GUHAM) تۇركيانىڭ ونەركاسىپ جانە تەحنولوگيالار مينيسترلىگىمەن, تۇركيانىڭ عىلىمي-تەحنولوگيالىق زەرتتەۋلەر كەڭەسىمەن (TÜBITAK) جانە بۋرسا مۋنيتسيپاليتەتىنىڭ قولداۋىمەن بۋرسا ساۋدا-ونەركاسىپ پالاتاسىمەن بىرلەسىپ ۇيىمداستىرعان. 

اتالعان كونگرەسكە قازاقستاننىڭ ۇشقىش-عارىشكەرى, قر تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى جانىنداعى «قازاقستان عارىش ساپارى» ۇلتتىق كومپانيا باسقارماسىنىڭ توراعاسى ايدىن ايىمبەتوۆ قاتىستى. بۋرسا ساۋدا-ونەركاسىپ پالاتاسىنىڭ وكىلدەرىمەن تالقىلاۋ بارىسىندا ايدىن ايىمبەتوۆ توتەنشە جاعدايلار كەزىندە عارىشتىق سپۋتنيكتەردى پايدالانا وتىرىپ جۇمىس ىستەۋدىڭ جاڭا ادىستەرىنە ەرەكشە نازار اۋداردى.

«تۇركياداعى جەر سىلكىنىسى عارىشتىق تەحنولوگيالار بيلىككە جەدەل اقپارات الۋعا جانە ۇسىنۋعا مۇمكىندىك بەرەتىندىگىن كورسەتتى. زارداپ شەككەن وڭىرلەردىڭ جوعارى ەگجەي-تەگجەيلى سپۋتنيكتىك سۋرەتتەرى وسىنداي تابيعي اپاتتاردىڭ سالدارىن باعالاۋ ماقساتىندا زاقىمدانۋ كارتالارىن جاساۋ ءۇشىن پايدالانىلادى», دەپ اتاپ ءوتتى ايدىن ايىمبەتوۆ.

تەحنيكالىق سەسسيالاردا الەمدەگى عارىش قىزمەتىنىڭ ودان ءارى دامۋى قاراستىرىلىپ, تۇركيا مەن باسقا ەلدەردىڭ عارىشتىق عىلىمي ميسسياسىنىڭ ماسەلەلەرى قوزعالدى. 

ءىس-شاراعا بولگاريا, كانادا, اقش, رەسەي, قىتاي, گەرمانيا, فرانتسيا, اۆستريا, حورۆاتيا, يزرايل, يتاليا, جاپونيا, نيدەرلاندى, يسپانيا, قازاقستان, سيريا, يسپانيا, رۋمىنيا جانە تۇركيادان بارلىعى 70 استروناۆت, عارىشكەر جانە عالىمدار قاتىستى. 

سونداي-اق كونگرەسستىڭ نەگىزگى تاقىرىبى تۇركيا رەسپۋبليكاسىنىڭ 100 جىلدىعىنا جانە مۇستافا كەمال اتاتۇرىكتىڭ «بولاشاق اسپاندا» سوزدەرىنە ارنالدى.