پرەزيدەنت كولىك-ترانزيت سالاسىندا ءتيىمدى ىقپالداستىق ورناتۋ قاجەت ەكەنىنە توقتالدى, دەپ جازادى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«بۇگىندە ورتالىق ازيا ايماعى جاھاندىق تاسىمالدىڭ نەگىزگى بولىگىنە اينالىپ كەلەدى. وسى رەتتە ءوڭىر «سولتۇستىك – وڭتۇستىك», «شىعىس – باتىس» باعىتتارى بويىنشا قۇرلىق كوپىرى رەتىندە ماڭىزدى ءرول اتقارادى. اسىرەسە, ترانسكاسپي باعدارىن دامىتۋدىڭ جانە ونى Global Gateway ستراتەگياسىمەن ۇشتاستىرۋدىڭ ماڭىزى ارتا ءتۇستى. ورتامەرزىمدى پەرسپەكتيۆادا اتالعان ءدالىز ارقىلى جۇك تاسىمالداۋ اعىنىنىڭ كولەمى بەس ەسە ارتار ەدى. وسى باعىتتا جوسپارلى جۇمىستار جۇرگىزىلۋدە. گەرمانيالىق سەرىكتەستەردى ترانسكاسپي باعدارى مەن كاسپي تەڭىزى پورتتارىن دامىتۋعا, سونداي-اق بىرلەسكەن كەمە ءوندىرىسىن قولعا الۋعا جانە لوگيستيكالىق ورتالىقتار اشۋ ىسىنە بەلسەندى اتسالىسۋعا شاقىرامىز», دەدى مەملەكەت باسشىسى.
قاسىم-جومارت توقاەۆتىڭ ايتۋىنشا, قازاقستان كاسىپورىندارى الەمدىك نارىقتاعى تيتان مەن باسقا دا ماتەريالدارعا دەگەن تاپشىلىقتىڭ ورنىن تولتىرۋعا ءازىر. مەملەكەت باسشىسى ەكولوگيا سالاسى مەن «جاسىل» ەكونوميكانى دامىتۋدى ىقپالداستىقتىڭ كەلەسى ماڭىزدى باعىتى رەتىندە اتاپ ءوتتى.
پرەزيدەنت استانادا ايماقتاعى بارلىق ەلدى قامتيتىن سۋتەگى ديپلوماتياسى كەڭسەسىن اشقانى ءۇشىن نەمىس تاراپىنا ريزاشىلىعىن ءبىلدىردى.
سونداي-اق گەرمانيا ۇكىمەتىنىڭ «جاسىل ورتالىق ازيا» باستاماسىنا جوعارى باعا بەردى. بۇل «ورتالىق ازياعا ارنالعان سۋ باستاماسى» جوباسىنىڭ جالعاسى سانالادى.