ەۋرازيا ۇلتتىق ۋنيۆەرسيتەتىندە «تۇرىك ءتىلى مەن مادەنيەتى» كابينەتى اشىلدى. جاڭا اۋديتوريادا قازاقستان جانە تۇركيا ماماندارى ستۋدەنتتەردىڭ تۇركى ينتەگراتسياسىن دامىتۋ, تۇركىتىلدەس مەملەكەتتەردىڭ ىنتىماقتاستىعىن جانە مادەني ديپلوماتياسىن نىعايتۋ باعىتىندا بىلىمدەرىن كەڭەيتەدى. بۇل جاس عالىمدارعا تۇركى حالىقتارىنىڭ تاريحى مەن مادەنيەتىن زەرتتەۋگە قوسىمشا مۇمكىندىكتەر بەرەدى.
جاڭا كابينەت تۇركولوگيا مەن تۇرىك ءتىلىن ۇيرەنۋگە قاجەتتى ماتەريالدىق-تەحنيكالىق بازامەن, ەلەكتروندى جانە باسپا وقۋ قۇرالدارىمەن, زاماناۋي ەلەكتروندى مۋلتيمەديالىق تاقتامەن جابدىقتالعان.
«تۇرىك ءتىلى مەن مادەنيەتى» اۋديتورياسىنىڭ اشىلۋىنا ل.ن.گۋميلەۆ اتىنداعى ەۇۋ رەكتورى ەرلان سىدىقوۆ, تۇركيانىڭ قازاقستانداعى توتەنشە جانە وكىلەتتى ەلشىسى مۇستافا كاپۋدجۋ, تۇرىك ىنتىماقتاستىق جانە ۇيلەستىرۋ اگەنتتىگىنىڭ پرەزيدەنتى حيكمەت ۋزدەنوعلى, ۋنيۆەرسيتەتتىڭ حالىقارالىق قاتىناستار فاكۋلتەتى تۇركولوگيا كافەدراسى وقىتۋشىلارى مەن ستۋدەنتتەرى قاتىستى. كەزدەسۋ بارىسىندا ە.سىدىقوۆ ەۇۋ تۇركيانىڭ 35-تەن اسا جەتەكشى ۋنيۆەرسيتەتىمەن بەلسەندى ىنتىماقتاستىق ورناتقانىن, ونداعان ستۋدەنت ەۇۋ-دا ءبىلىم الىپ جاتقانىن اتاپ ءوتتى. ەلىمىزدىڭ جاستارى اكادەميالىق ۇتقىرلىق باعدارلامالارى اياسىندا تۇركيا ۋنيۆەرسيتەتتەرىندە بىلىمدەرىن كەڭەيتۋگە مۇمكىندىك الدى.
«ىنتىماقتاستىق مامانداردى بىرلەسىپ دايارلاۋ شەڭبەرىندە عانا ەمەس, سونىمەن قاتار ەلدەرىمىزدىڭ ستۋدەنتتەرى مەن وقىتۋشىلارى ءۇشىن اكادەميالىق ۇتقىرلىق جانە تاعىلىمداما باعدارلامالارى اياسىندا دا دامىپ وتىر. بۇل كابينەت تۇركيا مەن قازاقستاندى بىرىكتىرەتىن تاعى ءبىر التىن كوپىر بولماق. وسى اۋديتوريا نەگىزىندە تۇركىتانۋ سالاسىنداعى مامانداردى دايارلاۋ كۇشەيتىلەدى. بۇل كابينەت ەكى ەلدىڭ مادەنيەتى مەن داستۇرلەرىن بىرىكتىرۋ ورتالىعى بولاتىنىنا سەنىمدىمىن. ۋنيۆەرسيتەت ۇجىمى تۇركيا ەلشىلىگىنە جانە تۇرىك ىنتىماقتاستىق جانە ۇيلەستىرۋ اگەنتتىگىنە كابينەتتى جابدىقتاعانى ءۇشىن العىس بىلدىرەدى», دەدى ە.سىدىقوۆ.
جاڭا وقۋ كابينەتى ەۇۋ-دىڭ تۇركىتانۋ كافەدراسىنا قارايدى. بۇل كافەدرا 2010 جىلدان بەرى باكالاۆريات, ماگيستراتۋرا جانە دوكتورانتۋرا دەڭگەيىندە 400-گە جۋىق مامان دايارلادى. قازىرگى تاڭدا 3 ءبىلىم بەرۋ باعدارلاماسى بويىنشا 100-دەن اسا ستۋدەنت وقىپ جاتىر.
ستۋدەنتتەرگە ارنالعان جاڭا كابينەت تۇركيانىڭ قازاقستانداعى ەلشىلىگى مەن تۇرىك ىنتىماقتاستىق جانە ۇيلەستىرۋ اگەنتتىگىنىڭ (TIKA) قولداۋىمەن اشىلدى.
ء«بىز بۇل كابينەتتى تۇرىك حالقى, تۇرىك جاستارى مەن قازاق باۋىرلارىمىزدىڭ قارىم-قاتىناسىن ودان ءارى جاقسارتاتىن جوبا رەتىندە قاراستىرامىز. بۇل اۋديتوريا ۇنەمى ستۋدەنتتەرگە تولى بولادى جانە ستۋدەنتتەر تۇرىك ءتىلىن وتە جاقسى مەڭگەرەدى دەپ ويلايمىن. ولارعا جاڭا مۇمكىندىكتەر اشىلادى. ءارتۇرلى تۇرىك فيرماسىندا جۇمىس ىستەپ, تۇركيادا ماگيستراتۋرادا وقۋعا مۇمكىندىك تۋادى. ەڭ باستىسى, جاستار ەلدەرىمىزدى بىرىكتىرىپ, قازاقستان مەن تۇركيا اراسىنداعى قارىم-قاتىناستىڭ دامۋىنا ماڭىزدى ۇلەس قوسادى», دەدى تۇركيا ەلشىسى م.كاپۋدجۋ.
تۇرىك ىنتىماقتاستىق جانە ۇيلەستىرۋ اگەنتتىگىنىڭ پرەزيدەنتى حيكمەت ۋزدەنوعلى ءتىل ادامدار اراسىنداعى قارىم-قاتىناستى قالىپتاستىراتىن كوپىر ەكەنىن اتاپ ءوتتى. ونىڭ ايتۋىنشا, اۋديتوريانىڭ اشىلۋى ىنتىماقتاستىق كوكجيەگىن كەڭەيتۋگە مۇمكىندىك بەرەدى.