قازاقستان رەسپۋبليكاسىنىڭ پرەزيدەنتى جانىنداعى مەملەكەتتىك باسقارۋ اكادەمياسىندا اتالعان اكادەميا مەن يندۋستريا جانە جاڭا تەحنولوگيالار مينيسترلىگىنىڭ ۇيىمداستىرۋىمەن “قازاقستان رەسپۋبليكاسىنىڭ يندۋستريالىق-يننوۆاتسيالىق ساياساتى: باسىمدىقتار مەن ىسكە اسىرۋ جولدارى” اتتى مەملەكەتتىك قىزمەتشىلەردىڭ بىلىكتىلىگىن ارتتىرۋ سەمينارى ءوتتى. ونى پرەمەر-ءمينيستردىڭ ورىنباسارى –يندۋستريا جانە جاڭا تەحنولوگيالار ءمينيسترى اسەت يسەكەشەۆ پەن پرەزيدەنت جانىنداعى مەملەكەتتىك باسقارۋ اكادەمياسىنىڭ رەكتورى ارىن ورساريەۆ اشتى.
سەمينار جيىنى بارىسىندا ءسوز العان پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆ ەلدەگى يندۋستريالىق-يننوۆاتسيالىق ساياساتتىڭ جۇزەگە اسىرىلۋى مەن ماقسات-مىندەتتەرىنە توقتالا كەلە, وسى باعىتتا ويلاعان ماقساتقا قول جەتكىزۋ ءۇشىن ءار ايماقتىڭ وزىندىك ەرەكشەلىگىنە وراي دامىتىلۋى ءتيىس باسىم باعىتتاردى تاڭداپ الۋ قاجەتتىگىن نازاردان تىس قالدىرمادى. ول ءۇشىن ايماقتا نەنى دامىتۋعا بولاتىندىعى جونىندە ارنايى كارتا دايىنداعان دۇرىس جانە بۇل جۇمىستاردى ءتۇرلى سالالار بويىنشا بىلىكتى مامانداردىڭ قاتىسۋىمەن جۇزەگە اسىرعان ءجون. ءتىپتى بيزنەس سالاسىنىڭ وكىلدەرىمەن دە كەڭەسىپ العاننىڭ ارتىقتىعى جوق. ەگەر وسى ءىس تالاپقا ساي ۇيىمداستىرىلاتىن بولسا, ەلىمىزدىڭ ءار وبلىسىنان بولاشاقتا دامىتۋعا قولايلى كەم دەگەندە جاقسى ءبىر سالا شىعادى, دەدى ۇكىمەت باسشىسىنىڭ ورىنباسارى.
اتالعان باسقوسۋدىڭ ماقساتى ەلىمىز يندۋستريالىق-يننوۆاتسيالىق ساياساتىنىڭ وزەكتى باعىتتارىن جاريالاۋ جانە تالقىلاۋ بولىپ تابىلادى. سەمينار تىڭداۋشىلارى اتالمىش جيىندا قازاقستاننىڭ ۇدەمەلى يندۋستريالىق-يننوۆاتسيالىق دامۋى جونىندەگى 2010-2014 جىلدارعا ارنالعان مەملەكەتتىك باعدارلاماسىنىڭ وزەكتى باعىتتارىمەن تانىستى. سونىمەن بىرگە وسى باعدارلامانىڭ قالىپتاستىرۋ قاعيداتتارىن جانە ونى جۇزەگە اسىرۋدىڭ اعىمدى تاجىريبەسىن زەردەلەۋ جايىنداعى ماعلۇماتتاردان, ونى جۇزەگە اسىرۋدىڭ نورماتيۆتىك قۇقىقتىق بازاسىنان دا حاباردار بولدى.
باسقوسۋدا بىرقاتار ۆەدومستۆولار وكىلدەرى ارنايى باياندامالار جاساپ, تىڭداۋشىلارمەن وسى ماسەلەلەر توڭىرەگىندە تاجىريبە الماستى. ونەركاسىپتىڭ باسىم سالالارى تۋرالى يندۋستريا جانە جاڭا تەحنولوگيالار ۆيتسە-ءمينيسترى نۇرمۇحامەد ابدىبەكوۆ, اوك 2014 جىلعا دەيىنگى دامۋىنىڭ نەگىزگى باعىتتارى جايىندا اۋىل شارۋاشىلىعى ۆيتسە-ءمينيسترى ارمان ەۆنيەۆ, ال يندۋستريالاندىرۋ كارتاسى تۋرالى يندۋستريا جانە جاڭا تەحنولوگيالار ۆيتسە-ءمينيسترى بەرىك قاماليەۆ باياندادى.
ءابدىراحمان قىدىربەك.