قىلقالاممەن تانىمال جاستاردىڭ پورترەتىن اق قاعازعا اينىتپاي تۇسىرەتىن يساتاي مايەمەروۆتىڭ اڭسارى بالا كەزىنەن بەينەلەۋ ونەرىنە اۋعان. قازىر ول ماحامبەت اۋدانىنىڭ جالعانساي اۋىلىندا تۇرادى.
اتا-انا باۋىرىنان تاراعان بەس بالانىڭ ءبىرى 2014 جىلى ماڭعىستاۋ وبلىسىنداعى ونەر كوللەدجىن سۋرەتشى ماماندىعىمەن بىتىرگەن. كەيىن م.وتەمىسوۆ اتىنداعى باتىس قازاقستان ۋنيۆەرسيتەتىنەن بەينەلەۋ ونەرى جانە سىزۋ ءپانىنىڭ مۇعالىمى ماماندىعىن الىپ, تۋعان اۋىلىنا ورالعان. قازىر اۋىلداعى «شالقىما» مادەنيەت ۇيىندە سۋرەتشى بولىپ جۇمىس ىستەيدى. اۋىل بالالارى ءۇشىن سۋرەت ۇيىرمەسىن اشىپ, 12 ورەندى بەينەلەۋ ونەرىنىڭ قىر-سىرىنا باۋلىپ ءجۇر.
«بالاباقشاعا بارعان كەزىمنەن سۋرەت سالۋدى ۇناتاتىن ەدىم. مەكتەپتە ءتۇرلى سۋرەت بايقاۋىنا قاتىستىم. قازىر ماماندىق تاڭداۋدا قاتەلەسپەگەنىمدى بىلەمىن. ويتكەنى سۋرەتشىلىك – جۇرەك قالاۋىم. اتاقتى سۋرەتشى پابلو پيكاسسونىڭ «سۋرەتشى كورگەنىن ەمەس, سەزىنگەنىن بەينەلەيدى» دەگەنى بار. مەن دە جۇرەكپەن سەزىنگەنىمدى اق قاعازعا تۇسىرەمىن. قىلقالامدى قولىما الىپ, تابيعات كورىنىسىن, تاريحي تاقىرىپقاردى, تانىمال ادامداردى بەينەلەگەن كەزدە دەمالامىن», دەيدى يساتاي مايەمەروۆ.
ول الەمگە تانىمال تۇلعالاردىڭ, اسىرەسە جاستاردىڭ پورترەتىنەن ءوز كوللەكتسياسىن جاساۋعا بەت بۇرعان. قازىر ونىڭ كوللەكتسياسىندا ءانشى ديماش قۇدايبەرگەننىڭ, جەكپە-جەك شەبەرى شاۆحات راحمونوۆتىڭ, فرانتسۋز فۋتبولشىسى كيليان مباپپەنىڭ جانە وزگە ايگىلى تۇلعالاردىڭ پورترەتىمەن تولىققان. سۋرەت سالۋمەن شەكتەلمەي, مەكەمەلەر مەن بالاباقشالار عيماراتتارىنىڭ قابىرعاسىن بەزەندىرەدى.
«سۋرەت سالۋ – تابيعاتى-نان تالانت دارىعان جاندارعا بەرىلەتىن كاسىپ. بەينەلەۋ ونەرى ادامدى تىلسىم الەمگە جەتەلەيدى. سۋرەتشىلىكتى كاسىپ كوزىنە اينالدىرىپ جۇرگەن ونەر ادامى از ەمەس. يساتاي مايەمەروۆتىڭ دە كاسىبىن ناسىبىنە اينالدىرۋعا مۇمكىندىگى بار. ونەرلى جاستى قولداۋ ماقساتىندا قايتارىمسىز گرانت بەرەتىن كونكۋرسقا قاتىسۋعا كەڭەس بەردىك. ءبىز ءۇشىن ەڭ باستىسى – وسىنداي تالانتتى جاستاردىڭ اۋىلدا تۇراقتاپ قالۋىنا مۇمكىندىك جاساۋ», دەيدى «اتامەكەن» ۇكپ اۋداندىق فيليالىنىڭ ديرەكتورى جەكسەنباي پازۋلوۆ.
اتىراۋ وبلىسى