ەلىمىزدە ەڭ كوپ جالاقى العان فۋتبولشىلار

باي-قۋاتتىلاردىڭ ءتىزىمىن جەرار گوۋ باستاپ تۇر. كوت-د’يۆۋاردان كەلگەن شابۋىلشىنىڭ 2014-2017 جىلدارى الماتىنىڭ «قايراتىندا» ونەر كورسەتكەن كەزدەگى ءبىر ايلىق جالاقىسى 160,5 مىڭ دوللاردى قۇراعان ەكەن. «قاي­راتتىڭ» ساپىندا ول 102 رەت جاسىل الاڭ­عا شىعىپ, 80 گول سوقتى. كەيىننەن گوۋ قىتايدىڭ «بەيتسزين ەنتەرپرايزەس» جانە تۇركيانىڭ «كاسىمپاشاسىندا» وينادى. 2022 جىلى قايتا قازاقستانعا ورالىپ, «اقتوبەنىڭ» جەيدەسىن كيدى. قازىر افريكالىق فۋتبولشى ءوز مانسابىن اياقتادى.

ەكىنشى ورىندا – اندرەي ارشاۆين. رەسەي فۋتبولىنىڭ جۇلدىزى ايىنا 120 مىڭ دوللار جالاقى الدى. 2016-2018 جىلدارى «شاۆا» 84 ماتچتا 24 مارتە مەرگەندىك تانىتتى. ءۇشىنشى ساتىعا ۆاگنەر لاۆ جايعاستى. كەزىندە برازيليانىڭ جاس­تار جانە ۇلتتىق قۇراماسى ساپىندا ويناعان شابۋىلشى 2020-2021 جىلدارى قازاقستان پرەمەر-ليگاسىندا 35 كەزدەسۋ وتكىزىپ, 14 رەت نىسانانى ءدال كوزدەدى. لاۆتىڭ جالاقىسى – 100 مىڭ دوللار. بۇل ويىنشىلاردىڭ بارلىعى دا «قايراتتىڭ» نامىسىن قورعادى.

سونداي-اق ەڭ كوپ جالاقى العانداردىڭ قاتارىندا اناتولي تيموششۋك (ۋكراينا, «قايرات». ايلىعى – 91,7 مىڭ دوللار), ماركوس پيززەللي (ارمەنيا, «اقتوبە». $75 مىڭ), دانيلو نەكو (برازيليا, «اقتوبە». $71,7 مىڭ), اندەرسون سانتانا (برازيليا, «اقتوبە». $61 مىڭ), دانيلو سيرينو (برازيليا, «اقتوبە». $61 مىڭ), مارين توماسوۆ (حورۆاتيا, «استانا». $60 مىڭ), جۋنيور كابانانگا (كونگو, «استانا». $60 مىڭ) جانە باۋىرجان يسلامحان (قازاقستان, «استانا». $60 مىڭ) سىندى اياقدوپ شەبەرلەرى بار.