كەزدەسۋ بارىسىندا پرەزيدەنت قازاقستان چەرنوگوريانى وڭتۇستىك-شىعىس ەۋروپاداعى ماڭىزدى سەرىكتەس رەتىندە قاراستىراتىنىن اتاپ ءوتتى, دەپ حابرلايدى Egemen.kz اقوردا ءباسپاسوز قىزمەتىنە سىلتەمە جاساپ.
قاسىم-جومارت توقاەۆ كەلەسى جىلى پودگوريتسا قالاسىندا قازاقستاننىڭ كونسۋلدىعىن اشۋ جوسپارى تۋرالى ايتتى. بۇل قادام ەكى ەل اراسىنداعى ىسكەرلىك جانە تۇلعاارالىق بايلانىستاردى دامىتۋعا تىڭ سەرپىن بەرەدى.
ء«بىزدىڭ ەلدەرىمىزدىڭ اراسى جاقىنداي ءتۇستى. سەبەبى ازاماتتارىمىز استانادان پودگوريتساعا تىكەلەي اۋە رەيسىمەن ۇشادى. جىل سايىن 40 مىڭنان استام ادام ۆيزاسىز رەجيمدى پايدالانادى. قازاقستان ازاماتتارى چەرنوگورياعا ەڭبەك دەمالىسىن وتكىزۋ ءۇشىن ۇشىپ بارادى. ارينە, بۇل ەلدەرىمىز اراسىنداعى گۋمانيتارلىق بايلانىس پەن ەكونوميكالىق ىنتىماقتاستىقتى دامىتۋعا تىڭ سەرپىن بەرەدى. ءبىز پودگوريتسادا ءوز كونسۋلدىعىمىزدى اشۋدى جوسپارلاپ وتىرمىز. اتالعان سالالارداعى وڭ ناتيجەلەرگە, اسىرەسە ەكونوميكالىق ىنتىماقتاستىقتاعى جەتىستىكتەرگە قاراي ءسىزدىڭ ەلىڭىزدە ەلشىلىگىمىزدى اشۋىمىز مۇمكىن», دەدى قاسىم-جومارت توقاەۆ.
ياكوۆ ميلاتوۆيچ ەكىجاقتى ىنتىماقتاستىقتىڭ قارقىندى دامىپ كەلە جاتقانىن اتاپ ءوتتى.
چەرنوگوريا پرەزيدەنتى جان-جاقتى بايلانىستى ودان ءارى نىعايتۋعا نيەت ءبىلدىردى.
«پرەزيدەنت مىرزا, مەن سىزبەن كەزدەسكەنىمە وتە قۋانىشتىمىن. ءوزىڭىز بىلەتىندەي, ءبىز قازاقستان مەن چەرنوگوريا اراسىنداعى دوستىقتى وتە جوعارى باعالايمىز. وسى كەزدەسۋگە مەنىمەن بىرگە ەلىمىزدىڭ پرەمەر-ءمينيسترى دە كەلدى. ول چەرنوگوريانى قازاقستاندىق تۋريستەر ءۇشىن تارتىمدى ەتۋگە ەرەكشە قىزىعۋشىلىق تانىتادى. ەكى ەل اراسىنداعى تىكەلەي اۋە رەيسىنىڭ قىزمەت كورسەتە باستاعانىنا وتە قۋانىشتىمىز. بىزگە قازاقستاننان تۋريستەردىڭ كوپتەپ كەلەتىنى قۋانتادى», دەدى ياكوۆ ميلاتوۆيچ.
پرەزيدەنتتەر حالىقارالىق كۇن تارتىبىندەگى ماسەلەلەردى جانە تاراپتاردىڭ بىرىككەن ۇلتتار ۇيىمى اياسىنداعى ءوزارا ىقپالداستىعىنىڭ جاي-كۇيىن تالقىلادى.
كەزدەسۋ سوڭىندا قاسىم-جومارت توقاەۆ پەن ياكوۆ ميلاتوۆيچ ءبىر-ءبىرىن ءوز ەلدەرىنە رەسمي ساپارمەن كەلۋگە شاقىردى.