قوعامدا استا-توك ىسىراپشىلدىق بەلەڭ الىپ بارادى. بۇل بۇگىنگى جاستاردىڭ نەمەسە كوزقاراسى بەكىمەگەن بالالاردىڭ ومىرلىك ۇستانىمىنا كەرى اسەرىن تيگىزەتىنى ءسوزسىز. كەز كەلگەن نارسەنىڭ سۇراۋى بار. سوندىقتان ءار وتباسىندا ۇنەمدىلىككە ءمان بەرىلۋى كەرەك.
مەملەكەت باسشىسىنىڭ جولداۋدا قوعامعا, جالپى ەل تۇرعىندارىنا ايتقان ۇسىنىسى دا وسى – ۇنەمشىلدىك دەر ەدىم. ماسەلەن, ۇيدە مەزگىلسىز جۇمسالعان ەلەكتر قۋاتى, كراننان اعىل-تەگىل اققان سۋ تەگىن جاتقان دۇنيەدەي كورىنەدى. بىراق ءبارى دە سايىپ كەلگەندە ىسىراپتىق تۇرمىستىڭ سيپاتى ەمەس پە؟ بيىلعى جازدا جامبىل وبلىسى ديقاندارىنىڭ سۋعا ءزارۋ بولىپ, بۇل ماسەلەنىڭ توتەنشە جاعدايعا دەيىن جەتۋى رەسپۋبليكانىڭ تۇكپىر-تۇكپىرىندەگى ءار ەلدى مەكەن باسشىلارى مەن تۇرعىندارىن ويلانتۋى قاجەت.
ەكىنشى ماسەلە – ءبىلىم سالاسى. مەملەكەت ءبىلىم مەن عىلىم سالاسىنا قولداۋ كورسەتىپ كەلەدى. بۇل قولداۋ عىلىمدى قارجىلاندىرۋدان, مۇعالىمدەردىڭ ەڭبەكاقىسىن كوتەرۋدەن, «جايلى مەكتەپ» باعدارلاماسىن باستاۋدان كورىنىس تاپتى. جولداۋدا دا ءبىلىم بەرۋ جۇيەسىن رەفورمالاۋ, ونىڭ ىشىندە ساپالى ءبىلىم الۋ, سونداي-اق قاۋىپسىز بالالىق شاقتى قامتاماسىز ەتۋ ماسەلەلەرى ءسوز بولدى. ءبىلىم الۋداعى تەڭدىكتى قامتاماسىز ەتۋ ماقساتىندا پرەزيدەنت بەس جاستان اسقان بالالارعا ارنالعان «كەلەشەك» اتتى بىرىڭعاي ەرىكتى جيناقتاۋ جۇيەسىن ەنگىزۋدى تاپسىردى. بۇل باعدارلامادا مەملەكەت تاراپىنان ۇسىنىلاتىن باستاپقى ءبىلىم بەرۋ كاپيتالى, جىل سايىنعى مەملەكەتتىك سىياقى جانە ينۆەستيتسيالىق تابىس قاراستىرىلۋعا ءتيىس. وسى جيناق پەن «ۇلتتىق قور – بالالارعا» جوباسىنىڭ قاراجاتى قوسىلعاندا جاس ۇرپاقتىڭ ساپالى ءبىلىم الۋىنا قولايلى جاعداي تۋدىراتىنىن كەسىپ ايتتى.
ءۇشىنشى – قوعامدىق سانا جانە ۇلت ساپاسىن كوتەرۋ ماسەلەسى. قازاق قوعامىنىڭ عاسىرلاردان كەلە جاتقان قۇندىلىقتار جۇيەسى قازىرگى قوعامدى تاربيەلەۋدە, مادەنيەتتى ورىستەتۋدە نەگىزىنە اينالۋى كەرەك. بۇل ەسكەرىلسە, اسىرەسە جاس ۇرپاقتىڭ وتانشىل, ءبىلىمپاز, ەڭبەكقور, ءتارتىپتى, ادال, ءادىل, ۇنەمشىل ءارى جاناشىر بولاتىنىنا داۋ جوق. سايكەسىنشە مۇنداي ازاماتتار ورىستەپ وركەندەسە, ەگەمەن قازاق ەلىنىڭ الار اسۋى دا اسقاق.
گۇلفايرۋز قايىرعاليەۆا,
تاريح عىلىمدارىنىڭ كانديداتى