اقش-قا جۇمىس ساپارى بارىسىندا مەملەكەت باسشىسى قاسىم-جومارت توقاەۆ Citigroup كومپانياسىنىڭ باس اتقارۋشى ديرەكتورى دجەين فرەيزەرمەن كەزدەستى, دەپ حابارلايدى Egemen.kz اقوردانىڭ اقپاراتىنا سىلتەمە جاساپ.
كەزدەسۋ بارىسىندا امەريكالىق قارجى حولدينگىنىڭ ەلىمىزدەگى قىزمەت اياسىن كەڭەيتۋ پەرسپەكتيۆالارى تالقىلاندى.
ەلىمىزدەگى بىردەن-ءبىر امەريكالىق بانك سانالاتىن Citibank Kazakhstan – حالىقارالىق ينۆەستورلار, مەملەكەتتىك سەكتور جانە ءىرى كاسىپورىندار ءۇشىن جەتەكشى سەرىكتەستەردىڭ ءبىرى. مەملەكەت باسشىسى جۋىردا جاريالاعان قازاقستان حالقىنا جولداۋى اياسىندا ۇكىمەتكە وسى سالاداعى باسەكەلەستىكتى ارتتىرۋ ءۇشىن ەلىمىزگە ءۇش سەنىمدى شەتەلدىك بانكتى تارتۋ مىندەتىن جۇكتەگەنىن اتاپ ءوتتى.
پرەزيدەنت استانا حالىقارالىق قارجى ورتالىعىنىڭ جاھاندىق ينۆەستورلارمەن بايلانىسىن قامتاماسىز ەتۋ جانە قارجى سەكتورىنىڭ تسيفرلىق ترانسفورماتسياسىن دامىتۋعا اتسالىسۋ ىسىندەگى Citigroup كومپانياسىنىڭ ماڭىزدى ءرولىن وڭ باعالادى.
مەملەكەت باسشىسى قازاقستاننىڭ كولىك-لوگيستيكالىق الەۋەتىن ارتتىرۋعا باعىتتالعان بىرقاتار جوبانى قارجىلاندىرۋعا نيەت ءبىلدىرىپ وتىرعان Citigroup حولدينگىنىڭ الداعى جوسپارىن قولدايتىنىن ايتتى. سونىمەن قاتار اڭگىمەلەسۋ بارىسىندا ماكروەكونوميكالىق بولجامدار مەن الەمدىك قارجى نارىعىنداعى نەگىزگى ۇردىستەر تالقىلاندى.
كەزدەسۋ اياسىندا «قازاقستان تەمىر جولى» ۇك» اق مەن Citibank اراسىندا Wabtec لوكوموتيۆتەرىن ساتىپ الۋ ءۇشىن قارجىلاندىرۋدى ۇيىمداستىرۋدىڭ نەگىزگى شارتتارى تۋرالى كەلىسىمگە قول قويىلدى.