ءماجىلىس سپيكەرى ەرلان قوشانوۆ كورەيانىڭ قازاقستانداعى توتەنشە جانە وكىلەتتى ەلشىسى چجو تە-يكپەن كەزدەستى. تاراپتار ەكى ەل اراسىنداعى قارىم-قاتىناستى نىعايتۋ ماسەلەسىن تالقىلادى, دەپ حابارلايدى Egemen.kz ءماجىلىستىڭ ءباسپاسوز قىزمەتىنە سىلتەمە جاساپ.
ءماجىلىس سپيكەرى كورەيا رەسپۋبليكاسى قازاقستاننىڭ ازياداعى نەگىزگى ساياسي جانە ەكونوميكالىق سەرىكتەسى ەكەنىن اتاپ ءوتتى.
ديپلوماتيالىق قارىم-قاتىناس ورناعانىنا بىلتىر 30 جىل تولعان قازاقستان مەن كورەيا كوپ باعىتتى ارىپتەستىكتى نىعايتۋدا جوعارى تابىستارعا قول جەتكىزدى. پرەزيدەنت قاسىم-جومارت توقاەۆتىڭ 2021 جىلعى كورەياعا مەملەكەتتىك ساپارى ناتيجەسىندە ەكى ەل كەڭەيتىلگەن ستراتەگيالىق سەرىكتەستىككە قول جەتكىزگەن ەدى.
«وسى اپتانىڭ اياعىندا ۇلتتىق اسسامبلەيانىڭ توراعاسى, ارىپتەسىم كيم دجين پيو مىرزانىڭ شاقىرۋىمەن كورەيا رەسپۋبليكاسىنا رەسمي ساپارمەن بارامىن. بۇل ساپاردىڭ باستى ماقساتى - ەكى ەل باسشىلارى ۋاعدالاستىقتارىن پارلامەنت دەڭگەيىندە جالعاستىرۋ. سونىمەن قاتار كورەيانىڭ باستاماسىمەن ۇيىمداستىرىلعان «ورتالىق ازيا – كورەيا رەسپۋبليكاسى» پارلامەنتتەرى سپيكەرلەرىنىڭ العاشقى كونفەرەنتسياسىنا دا قاتىسامىن», دەدى ەرلان قوشانوۆ.
كورەيانىڭ قازاقستانداعى توتەنشە جانە وكىلەتتى ەلشىسى چجو تە-يك پالاتا توراعاسىنىڭ كورەياعا ساپارىنا ساتتىلىك تىلەپ, دوستاس ەلدەر اراسىنداعى پارلامەنتارالىق بايلانىستىڭ دامۋىنا ءوز ۇلەسىن قوساتىنىنا سەنىم ءبىلدىردى.
«وزدەرىڭىز بىلەسىزدەر, ءبىزدىڭ ەلىمىز 1950 جىلدارى وتە كەدەي مەملەكەت بولىپ, ونەركاسىپ پەن ساۋدانىڭ ارقاسىندا اياققا تۇردى. بۇگىندە دامۋشى جانە دامىعان ەلدەر اراسىنداعى كوپىر سەكىلدى ءرول اتقارىپ كەلەدى. كورەياعا ساپارىڭىز ۋاقىتىلى بولىپ جاتىر دەپ ويلايمىن. ساپار بارىسىندا كورەيا پرەمەر-مينيسترىمەن, پارلامەنت سپيكەرلەرىمەن كەزدەسۋلەر جوسپارلانىپ وتىر», دەدى چجو تە-يك.
سونىمەن قاتار سپيكەر كەلەشەكتە دوستىق توپتار مەن بەيىندى كوميتەتتەر دەڭگەيىندەگى بايلانىستى ودان ءارى نىعايتۋعا شاقىردى.