التاي وڭىرىندە ۇلتتىق ۇلاننىڭ باتالون كومانديرلەرى وقۋ-ادىستەمەلىك جيىنىن وتكىزىپ جاتىر. جيىننىڭ ءۇشىنشى كۇنى تاكتيكالىق اتۋ دايىندىعى تاقىرىبى بويىنشا دالالىق جاعدايدا وتكىزىلدى, دەپ حابارلايدى Egemen.kz.
قورعانىس مينيسترلىگىنە قاراستى 27943 اسكەري ءبولىمىنىڭ وقۋ ورتالىعىنا كەلگەن كومانديرلەر اتۋ جانە اتۋ جاتتىعۋلارى بويىنشا تاجىريبە جينادى.
«بۇگىن اسكەري تەحنيكالاردى قولدانا وتىرىپ, ءتۇرلى قارۋ-جاراقتان وق اتتىق. ماسەلەن, بتر-80 تەحنيكاسىنا قاتىستى № 1 جاتتىعۋدى ورىندادىق. بتر-80 تەحنيكاسىنا قوندىرىلعان تانككە ارنالعان ءىرى كاليبرلى ۆلاديميروۆ پۋلەمەتىنەن بەلگىلەنگەن نىساندى جويدىق جانە كالاشنيكوۆ تانك پۋلەمەتىنەن تاپسىرىلعان نىساندى قۇلاتتىق. وقۋ-ادىستەمەلىك جيىنىندا بمپ-1, رپگ-7ۆ, اگس-17 سەكىلدى وزگە دە قارۋ-جاراقتى قولدانىپ, تاجىريبەمىزدى مولايتىپ جاتىرمىز. مۇنىڭ ءبارىن كەز كەلگەن باتالون كومانديرى جەتىك مەڭگەرگەنى ابزال. بۇل جولعى جيىننىڭ كوزدەگەن ماقساتتارىنىڭ ءبىرى – وسى», دەدى 6506 اسكەري ءبولىمىنىڭ 2 جەدەل ماقساتتاعى باتالون كومانديرى كاپيتان تولەبەك باعداۋلەت.
باتالون كومانديرلەرى قارۋلاندىرىلعان بمپ جانە بتر تەحنيكاسىنان وق اتۋ, رپگ-7ۆ قارۋىن قولدانۋ, اگس-17 قارۋىنان اتۋ, سپگ-9 قارۋىمەن نىساندى جويۋ جاتتىعۋلارى بويىنشا سىناق تاپسىردى. سونىمەن قاتار اسكەري تەحنيكالاردى جۇرگىزىپ كوردى.
«قازىرگى ساتتە ۇلتتىق ۇلان بازاسىندا بار قارۋ تۇرلەرىنەن عانا ەمەس, قورعانىس مينيسترلىگى قولداناتىن قارۋ-جاراقتى دا پايدالانىپ جاتىرمىز. اسكەري تەحنيكالاردى جۇرگىزدىك. بۇگىنگىدەي جيىننىڭ كومەگىمەن جاۋىنگەرلىك دايارلىقتىڭ, تاكتيكالىق ءادىس-تاسىلدەردىڭ جاڭارتىلعان نۇسقالارىن ۇيرەنىپ, ونى وزىمىزگە باعىنىستى جەكە قۇرامعا ۇيرەتەمىز», دەدى 5546 اسكەري ءبولىمىنىڭ جەدەل ماقساتتاعى باتالون كومانديرى كاپيتان الىشەر بەكجىگىت.
سونداي-اق «جاڭا وقىتۋ باعدارلامالارىنا سايكەس جاۋىنگەرلىك دايىندىقتى ۇيىمداستىرۋ» تاقىرىبىندا دوڭگەلەك ۇستەل ۇيىمداستىرىلدى. تاقىرىپقا قاتىستى ماسەلەلەر قوزعالىپ, ءتۇرلى ۇسىنىستار ايتىلدى. باس قوسۋدا جاڭا وقىتۋ باعدارلامالارىن ەنگىزۋ تيىمدىلىگى تۋرالى باتالون كومانديرلەرىنىڭ پىكىرلەرى تىڭدالدى. وسىدان كەيىن ۇلتتىق ۇلان باس قولباسشىسىنىڭ ورىنباسارى گەنەرال-مايور باۋرجان ءابجانوۆ «قازىرگى كەزەڭدەگى اسكەري دايىندىقتى دامىتۋدىڭ زاماناۋي پەرسپەكتيۆالارى» تاقىرىبىندا توپتىق ساباق وتكىزدى. ال ادىستەمەلىك دايارلىق بارىسىندا كومانديرلەر «اسكەري جاساقتى ازىرلەۋدىڭ فورماسى جانە جاڭا ادىستەرى» جونىندەگى پراكتيكالىق ساباققا قاتىستى.
ايتا كەتەيىك, ەرتەڭ باتالون كومانديرلەرى ۇلتتىق ۇلاننىڭ قىزمەتتىك-جاۋىنگەرلىك قولدانبالار تاكتيكاسى جونىندەگى ساباقتارعا قاتىسادى. سونىمەن قاتار باتالون كومانديرلەرىنە قاتىستى ادىستەمەلەردى ۇيرەنەدى. ال وقۋ-ادىستەمەلىك جيىن 15 قىركۇيەك كۇنى قورىتىندىلانادى.