بۇل تۋرالى مەملەكەت باسشىسى قاسىم-جومارت توقاەۆ اقوردادا وتكەن وتاندىق بيزنەس وكىلدەرىمەن كەزدەسۋ بارىسىندا ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«وسىنداي القالى جيىن وتكىزۋ جاقسى داستۇرگە اينالدى. سەبەبى, بيزنەس سالاسى – ۇلتتىق ەكونوميكانىڭ نەگىزگى تىرەگىنىڭ ءبىرى. مەملەكەت كاسىپكەرلىكتى دامىتۋعا باسا ءمان بەرىپ وتىر. ءبىز قازىر ادىلەتتى قازاقستاننىڭ جاڭا ەكونوميكالىق مودەلىن قالىپتاستىرۋعا كىرىستىك. بۇل – بارشامىزعا ورتاق جۇمىس, ەڭ الدىمەن, ەلىمىزدىڭ كەلەشەگى ءۇشىن وتە ماڭىزدى قادام. وسى جۇمىسقا كاسىپكەرلەرىمىز بەلسەنە اتسالىسۋى قاجەت. سوندىقتان, ءبىز بۇگىن بيزنەس سالاسىندا قوردالانعان ماسەلەلەردى تالقىلايمىز. الداعى مىندەتتەردى ايقىنداپ الۋىمىز كەرەك», دەدى مەملەكەت باسشىسى.
ايتا كەتسەك, پرەزيدەنت ءوز جولداۋىندا ەلىمىزدى ودان ءارى دامىتۋعا ارنالعان تىڭ تاسىلدەردى ۇسىنعان ەدى. سونداي-اق ەل ەكونوميكاسىنىڭ ءوسىمىن كەمىندە 6-7 پايىزعا جەتكىزۋ كەرەك ەكەنىن دە اتاپ ءوتتى.
«ول ءۇشىن بيزنەستىڭ جەكە باستامالارىنا بارىنشا قولداۋ كورسەتۋ قاجەت. وسى باعىتتا ءبىراز شارۋا اتقارىلدى. دەگەنمەن, كاسىپكەرلىكتىڭ دامۋ قارقىنى ءالى دە بولسا باسەڭ, ءوز الەۋەتىنە ساي ەمەس دەۋگە بولادى. ءبىر سوزبەن ايتقاندا, بىزگە شىن مانىندە ساپالى سەرپىلىس قاجەت. ەڭ الدىمەن, مەملەكەت پەن بيزنەستىڭ قارىم-قاتىناسى مۇلدە جاڭا ۇلگىگە كوشۋگە ءتيىس», دەدى ەل پرەزيدەنتى.
مەملەكەت باسشىسىنىڭ ايتۋىنشا, مەملەكەتتىك اپپارات ءاربىر بيزنەسمەنگە زاڭ بۇزۋشى رەتىندە قاراماۋى كەرەك. مۇنداي ۇستانىم, تۇپتەپ كەلگەندە, باسقارۋدىڭ رەپرەسسيۆتى سيپاتىنا الىپ كەلەدى. پرەزيدەنت مەملەكەت كاسىپكەرلەرگە كومەكتەسۋگە مىندەتتى ەكەنىن دە اتاپ ءوتتى.