تۇركىستان وڭىرىندەگى شاعىن جانە ورتا بيزنەستى دامىتۋ ماسەلەسىنە جان-جاقتى جاسالىپ جاتقان جاعدايلاردى ءتيىمدى پايدالانا بىلگەن شاردارالىق كاسىپ يەسى ايسۇلۋ باراتوۆا باۋىرلارىمەن بىرگە شاعىن تسەح اشىپ, كىر جۋاتىن سابىن جانە ىدىس جۋعا ارنالعان سۇيىق سابىن شىعارىپ وتىر, دەپ جازادى Egemen.kz.
كاسىبىن وتكەن جىلى قاراشا ايىندا باستاعان ا. باراتوۆانىڭ شاعىن تسەحى بۇگىندە تاۋلىگىنە ىدىس جۋعا ارنالعان 300 ليتر سۇيىقتىق پەن 250-300 دانا كىر سابىن وندىرەدى. وندىرىلگەن ونىمدەرىن شاردارا, جەتىساي, ماقتاارال اۋدانىمەن قاتار شىمكەنت قالاسىنا تاپسىرىسپەن جونەلتىپ وتىرادى ەكەن. ءونىم وندىرۋگە قاجەتتى شيكىزاتتى الماتى قالاسى مەن كورشىلەس وزبەكستاننان تاسىمالدايدى. الداعى ۋاقىتتا ءونىم تۇرلەرىن كوبەيتىپ, كاسىپورىننىڭ قۋاتتىلىعىن ارتتىرۋعا نيەتتەنىپ جۇرگەن جاس كاسىپكەرگە مەملەكەتتەن قولداۋ, قايتارىمسىز گرانت كەرەك.
تۇركىستان وبلىسى اكىمىنىڭ ءباسپاسوز قىزمەتىنىڭ مالىمەتىنشە, وبلىس اكىمى دارحان ساتىبالدىنىڭ وڭىرلەردە كاسىپكەرلىكتى دامىتۋعا قاتىستى تاپسىرماسى جانە قابىلدانعان مەملەكەتتىك باعدارلامالار مەن جان-جاقتى قولداۋلار جەكە كاسىپپەن شۇعىلدانۋعا جانە كاسىبىن كەڭەيتۋگە نيەتتەنۋشىلەرگە مول مۇمكىندىك قاراستىرعان. سونداي مۇمكىندىكتەردى شاردارا اۋدانىنان 21 جاس ءتيىمدى پايدالانىپ, 1,3 ملن تەڭگە قايتارىمسىز گرانت السا, 33 جاس 5 ملن تەڭگەگە دەيىنگى گرانتتارعا قۇجات تاپسىرعان.
ء«بىز ءوز ءىسىن باستايمىن نەمەسە كاسىبىمدى كەڭەيتەمىن دەگەن كەز كەلگەن جاسقا قولداۋ كورسەتۋگە دايىنبىز. ءتۇسىندىرۋ جۇمىستارىن دا ۇزدىكسىز جۇرگىزىپ كەلەمىز», دەيدى شاردارا اۋداندىق «جاستار رەسۋرستىق ورتالىعى» كمم-ءى باسشىسى باتىر قالداربەك.
جەكە قاراجاتى ەسەبىنەن ءوز ءىسىن باستاعان ا.باراتوۆا كاسىبىنىڭ قىر-سىرىن الماتى قالاسىندا باۋىرلارىمەن بىرگە وقىپ, ۇيرەنگەن. بۇگىندە ونىمدەرىنە دەگەن سۇرانىستىڭ ارتۋىنا بايلانىستى قوسىمشا قۇرال-جابدىقتار مەن جۇمىسشى كۇشىن ارتتىرۋ بويىنشا قۇجاتتارىن دايىنداۋدى قولعا العان جانە ۇلكەن قالالارداعى ساۋدا ورتالىقتارى مەن تۇتىنۋشىلارعا ءونىم جەتكىزىپ بەرۋ مەكەمەلەرىمەن دە كەلىسىم شارتتار جاساۋدى باستاعان.