جەتىسۋدا تەاتر ساڭلاعى, ايگىلى اكتريسا بيكەن ريموۆانىڭ 100 جىلدىعىنا ارنالعان «BIKEN» I حالىقارالىق تەاتر فەستيۆالى وتەدى. ايتۋلى ءىس-شاراعا ءوڭىر اكىمى قولداۋ كورسەتىپ وتىر. ودان بولەك تۇركسوي حالىقارالىق ۇيىمى دا اتسالىسپاق. ونعا جۋىق مەملەكەتتەن كەلگەن تەاتر مايتالماندارى تالدىقورعان تورىندە باق سىنايدى, دەپ حابارلايدى Egemen.kz.
كۇنى كەشە جەتىسۋ جەرىنە تۇركسوي حالىقارالىق ۇيىمىنىڭ باس حاتشىسى سۇلتان راەۆ ارنايى ىسساپارمەن كەلدى. ول كيەلى ونەر ورداسى ب.ريموۆا اتىنداعى تالدىقورعان دراما تەاترىنىڭ ۇيىمداستىرۋىمەن قولعا الىنعان فەستيۆالدىڭ جۇمىس جوسپارىمەن تانىستى.
سالتاناتتى جيىننىڭ ماقساتى – ساحنا ساڭلاعى بيكەن ريموۆانىڭ 100 جىلدىعىن مەرەكەلەۋ, سونىمەن قاتار, رەجيسسەرلەر مەن اكتەرلەر اراسىنان كاسىبي قولتاڭباسى قالىپتاسقان ۇزدىك ساحناگەرلەردى انىقتاۋ. وعان قازاقستاننان ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى, ن.ءجانتورين اتىنداعى ماڭعىستاۋ وبلىستىق مۋزىكالىق دراما تەاترى, ج.ايماۋىتوۆ اتىنداعى پاۆلودار وبلىستىق قازاق مۋزىكا-دراما تەاترى, س.سەيفۋللين اتىنداعى قاراعاندى وبلىستىق اكادەميالىق دراما تەاترى, الماتى قالالىق مادەنيەت باسقارماسىنىڭ «جاڭا عاسىر» تەاترى, استانا قالالىق «مۋزىكالىق جاس كورەرمەن تەاترى» جانە شەت ەلدەن تۇركيا, ازەربايجان, تۇركمەنستان, وزبەكستان, قىرعىزستان مەملەكەتتەرى قاتىسادى.
باعدارلاما اياسىندا بيكەن ريموۆانىڭ ءبيۋستى سالتاناتتى تۇردە اشىلادى. سونىمەن قاتار عاسىرعا جۋىق تاريحى بار م.اۋەزوۆ اتىنداعى قازاق ۇلتتىق دراما تەاترى فەستيۆالدىڭ شىمىلدىعىن بيكەن ريموۆا باستى ءرولدى سومداعان «ەڭلىك-كەبەك» قويىلىمىمەن اشپاق. ونىڭ باستى سەبەبى, ايگىلى اكتريسانىڭ ءتول تەاترعا عۇمىرىنىڭ باسىم بولىگىن ارناعانى بولىپ وتىر.
سۇلتان راەۆ تەاتردىڭ شىعارماشىلىق ۇجىمىمەن كەزدەسۋ بارىسىندا تەاتر ۇجىمىنا شىعارماشىلىق تابىس تىلەي وتىرىپ, حالىقارالىق فەستيۆالگە قاتىسۋعا دايىن ەكەندىگىن جەتكىزدى. سونداي-اق ۇيىم اياسىنداعى بەلسەندى جۇمىسى ءۇشىن جەتىسۋ وبلىسىنىڭ اكىمشىلىگىنە ب.ريموۆا اتىنداعى تالدىقورعان دراما تەاترىنا ساتتىلىك تىلەپ, حالىقارالىق تەاتر فەستيۆالىنىڭ جوعارى دەڭگەيدە وتكىزۋگە تۇركسوي تەاترلار اراسىنداعى بايلانىستاردى نىعايتۋعا زور ۇلەس قوساتىنىن ايتتى ال ءوز كەزەگىندە تەاتر ديرەكتورى ەرلىك جۋاسبەك سۇلتان راەۆقا العىس ءبىلدىرىپ, قازاقى داستۇرمەن قامشى جانە بيكەن ريموۆانىڭ فوتوالبومىن سىيعا تارتتى.
بيىل تۇركسوي دەڭگەيىندە تەاتر جانە كينو اكتريساسى بيكەن ريموۆانىڭ 100 جىلدىعى, قوعام قايراتكەرى تەمىربەك جۇرگەنوۆتىڭ 125 جىلدىعى, جازۋشى ماعجان جۇماباەۆتىڭ 130 جىلدىعى, قازاق اقىنى, ادەبيەتتانۋشى, جازۋشى مۇزافار الىمباەۆتىڭ 100 جىلدىعى تۇركى تىلدەس ەلدەردە كەڭىنەن اتالىپ وتەدى.
ايتا كەتەيىك, تەاتر فەستيۆالى حالىقارالىق دەڭگەيدە وتكىزىلەتىن بولعاندىقتان قازىلار القاسىنىڭ مۇشەلەرى قازاقستانمەن قوسا, ازەربايجان, باشقۇرتستان ەلدەرىنەن ساراپتالدى.
جەتىسۋ وبلىسى