جولداۋ جۇكتەگەن مىندەتتەردى جۇزەگە اسىرۋ جولدارى پىسىقتالدى

«ەل پرەزيدەنتى قاسىم-جومارت توقاەۆتىڭ بيىلعى جولداۋىندا تۇركىستان ءوڭىرىنىڭ دامۋىنا تىكەلەي ىقپال ەتەتىن ماسەلەلەر كوتەرىلىپ, مىندەتتەر جۇكتەلدى. تاياۋدا ۇكىمەتتىڭ قاراۋىمەن جولداۋدى جۇزەگە اسىرۋ جونىندەگى ناقتى ءىس-قيمىل جوسپارى بەكىتىلەدى. ءبىز دە ءوز تاراپىمىزدان الەۋەتىمىزدى سارالاپ, دايىندىقتى باستاۋىمىز كەرەك. وبلىس اكىمىنىڭ ورىنباسارلارى, باسقارما باسشىلارى, اۋدان, قالا اكىمدەرى وزدەرىنە تيەسىلى سالالارى بويىنشا جوسپار جاساپ, ەلدىڭ ءال-اۋقاتىن كوتەرۋ, جولداۋداعى مىندەتتەردى جۇزەگە اسىرۋ بويىنشا جۇمىستى كۇشەيتۋلەرى ءتيىس», دەدى دارحان ساتىبالدى.

وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ق.قايىپبەك جولداۋدا بارلىق سالانىڭ وزەكتى ماسەلەلەرى قامتىلعانىن اتاپ ءوتتى. مەملەكەت باسشىسى ماكروەكونوميكالىق ساياساتتى قايتا جۇكتەۋ ءۇشىن بيۋدجەتتىك-سالىقتىق ساياساتتى دامىتۋدى تاپسىردى. سونىمەن بىرگە بيىل ەكونوميكانىڭ ءوسىمىن 4% دەنگەيىندە قامتاماسىز ەتۋدى جۇكتەدى. بيىل وبلىستىڭ جالپى وڭىرلىك ءونىمىن 3,5 ترلن تەڭگەگە نەمەسە 3,6% وسىمگە قول جەتكىزۋ جوسپارلانعان. بۇدان بولەك, وبلىس ەكونوميكاسىنىڭ تۇراقتىلىعىن قامتاماسىز ەتۋ ماقساتىندا 2024-2028 جىلدارعا ارنالعان الەۋمەتتىك-ەكونوميكالىق دامۋ جوسپارىنىڭ 2-كەزەڭى ازىرلەنىپ جاتىر. بولجامعا سايكەس, 2028 جىلعا قاراي جالپى وڭىرلىك ءونىم كولەمىن 1,5 ەسە كوبەيتىپ, 5,2 ترلن تەڭگەگە جەتكىزۋ كوزدەلىپ وتىر.

وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى ر.مۇزدىبەكوۆ پەن وبلىستىق كاسىپكەرلىك جانە ونەركاسىپ باسقارماسىنىڭ باسشىسى ن.مىرزاحمەتوۆ تە ءوز سالالارى بويىنشا اتقارىلاتىن جۇمىستارعا توقتالدى.

قازىرگى تاڭدا «كەنتاۋ قالاسى №5 جەو قازاندىقتارىن, جىلۋ جۇيەلەرىن جانە قوسالقى قوندىرعىلارىن قايتا قۇرۋ» نىسانى بويىنشا وبلىستىق بيۋدجەتتەن 3 ملرد تەڭگە قارجى ءبولىنىپ, مەردىگەر مەكەمەلەر تاراپىنان ءتيىستى جۇمىستار اتقارىلىپ جاتىر. وبلىستاعى 833 ەلدى مەكەننىڭ 814-ءى ورتالىقتاندىرىلعان ەلەكتر جەلىسىنە قوسىلعان, قالعان 19 ەلدى مەكەننىڭ تۇرعىندارى دەربەس ەلەكتر قوندىرعىسىنان ەلەكتر قۋاتىن پايدالانىپ وتىر. سونىمەن قاتار وبلىس اۋماعىندا جاڭارتىلاتىن ەنەرگيا كوزدەرى سالاسىن دامىتۋ باعىتىندا بىرقاتار جۇمىستار ىسكە اسىرىلىپ جاتىر. قازىرگى تاڭدا, تۇركىستان وبلىسى اۋماعىندا جالپى قۋاتى 228,6 مۆت قۇرايتىن 23 جاڭارتىلاتىن ەنەرگيا كوزدەرى جوبالارى ىسكە اسىرىلعان. بيىل قازان ايىنا دەيىن وتىرار اۋدانى, ءشاۋىلدىر ەلدى مەكەنىندە قۋاتى 50 مۆت قۇرايتىن ء«شاۋىلدىر» كۇن ەلەكتر ستانتسياسىنىڭ قۇرىلىس جۇمىستارى اياقتالىپ, پايدالانۋعا بەرىلەدى.

جولداۋدا ءىرى كاسىپورىنداردىڭ شيكىزاتتى كەزەڭ-كەزەڭىمەن قايتا وڭدەۋ باعىتىنداعى مىندەتتەمەلەرىن بەكىتۋ جونىندە ايتىلدى. كوكونىستى, جەمىس-جيدەكتى, اۋىل شارۋاشىلىعى ونىمدەرىن تەرەڭ وڭدەۋ ءىسى جاندانادى. وسى ورايدا, اتالعان سالانى دامىتۋدىڭ ماڭىزدىلىعىن ەسكەرە وتىرىپ, وتاندىق جانە شەتەلدىك ينۆەستورلاردى تارتۋ بويىنشا بىرقاتار جۇمىستار اتقارىلىپ جاتىر. اتاپ ايتقاندا, ماقتانى تەرەڭ وڭدەۋ جانە كلاستەر قۇرۋ بويىنشا وزبەكستاندىق «Global Textile» جانە قىتايلىق «Peng Sheng» كومپانيالارىمەن ۋاعدالاستىققا قول جەتكىزىلدى. سونىمەن قاتار شاردارا اۋدانىندا «كازكراحمال» جشس جۇگەرىنى تەرەڭ وڭدەۋ زاۋىتىنىڭ قۇرىلىسىن جۇرگىزۋدە جانە «Atmo Capital Turkistan» جشس-ءى قىزاناق جانە باقشا داقىلدارىن تەرەڭ وڭدەۋ زاۋىتىن جۇزەگە اسىرۋدى جوسپارلاپ وتىر.

تۇركىستان قالاسىندا پياز جانە سارىمساق داقىلدارىن تەرەڭ وڭدەۋ ارقىلى كەپتىرىلگەن دايىن ونىمدەرگە قوسىلاتىن دامدەۋىشتەرىن ءوندىرۋ زاۋىتىنىڭ قۇرىلىسىن باستاۋ ماسەلەسى دە قاراستىرىلدى. سونداي-اق سايرام اۋدانىندا «Nurym Group» جشس قۇراما جەم ءوندىرىسى جانە ءىرى قارا مال قالدىقتارىن تەرەڭ وڭدەۋ زاۋىتىنىڭ قۇرىلىسىن جوسپارلاپ وتىر. ودان وزگە دە جوسپارلار بار.

ايتا كەتسەك, تۇركىستان وبلىسىندا ونەركاسىپ سالاسىندا سوڭعى 5 جىلدا ءونىم كولەمى 2 ەسە ءوسىپ, 2022 جىلى 866,6 ملرد تەڭگەگە جەتكەن. 2023 جىلدىڭ 7 ايىنىڭ قورىتىندىسى بويىنشا 519,3 ملرد تەڭگەنىڭ ءونىمى ءوندىرىلىپ, ناقتى كولەم يندەكسىنىڭ 104,5% قۇراعان. اتالعان سالادا 350-دەن اسا كاسىپورىن جۇمىس ىستەپ, 31,7 مىڭ ادام جۇمىسپەن قامتىلعان.