قورىتىندى تۋرنير ورنى – كانكۋن

ارينە, ەلەناعا ونداي قۇر­مەتتىڭ تەگىن كورسەتىلىپ وتىر­ماعانى انىق. سوڭعى جىلدارى 24 جاستاعى جەرلەسىمىز ورەلى ونەرىمەن كوزگە ءتۇسىپ, تولايىم تا­بىستارعا قول جەتكىزىپ ءجۇر. 2021 جىلى ول رولان گارروستىڭ شيرەك فينالىنا دەيىن جەتسە, 2022 جىلى ۋيمبلدوندا قارسىلاس شىداتپاي, باس جۇلدەنى ولجالادى. بيىل اۋستراليانىڭ اشىق بىرىنشىلىگىنىڭ اقتىق سىنىنا دەيىن القىنباي جەتتى. بۇعان قوسا WTA تۋرنيرلەرىن بەس مارتە ۇتىپ, ITF دودالارىندا ءتورت رەت دارالاندى. ءبىر عاجابى, بيىلعى ماۋسىمدا رىباكينا الەمنىڭ 1-راكەتكاسى پولشالىق يگا سۆەنتەكتىڭ ءوزىن ءۇش رەت ۇتتى. بۇل كۇندەرى قورجىنىندا 5 476 ۇپايى بار قازاقستاننىڭ وكىلى الەمدىك رەيتينگتە ءتورتىنشى ورىندا تۇر. جەر-جاھاننىڭ ەڭ تاڭداۋلى سەگىز تەننيسشىسىنىڭ باسىن قوساتىن باسەكە 29 قازان مەن 5 قاراشا ارالىعىندا مەك­سيكانىڭ كانكۋن قالاسىندا وتەدى. ونىڭ جۇلدە قورى شامامەن 5 ميلليون اقش دوللارىن قۇرايدى.

WTA-نىڭ ايەلدەر ارا­سىن­داعى قورىتىندى ءتۋر­نيرى 1972 جىلدان بەرى ۇيىم­داستىرىلىپ كەلەدى. سول ارالىقتا ەڭ كوپ ولجاعا كەنەلگەن – مارتينا ناۆرا­تيلوۆا. چەحوسلوۆاكيادا تۋىپ-ءوسىپ, كەيىننەن اقش-قا قونىس اۋدارعان ايگىلى تەننيسشى وتكەن عاسىردىڭ جەتپىسىنشى جانە سەكسەنىنشى جىلدارى سەگىز بىر­دەي تۋرنيردە (1978-1979, 1981, 1983-1986 جىلدارى) تەڭدەسسىز دەپ تانىلدى. گەرمانيالىق شتەففي گرافف (1987, 1989, 1993, 1995-1996) پەن امەريكالىق سەرەنا ۋيليامس (2001, 2009, 2012-2014) بەس رەتتەن توپ جاردى. اقش-تىڭ تاعى ءبىر وكىلى كريس ەۆەرت (1972, 1973, 1975, 1977) ءتورت جارىستا وزدى. اتالعان ءتۋرنيردىڭ تۇڭ­عىش جەڭىمپازى دا ءدال وسى سپورتشى.

ەرلەر اراسىنداعى رەكوردتىق كورسەتكىش رودجەر فەدەرەر مەن نوۆاك دجوكوۆيچكە تيەسىلى. ەكەۋى التى رەتتەن باس جۇلدەنى ولجالادى. شۆەيتساريانىڭ ماقتانىشى 2003-2004, 2006-2007, 2010-2011 جىلدارى قارسىلاس شاق كەلتىرمەسە, سەربيانىڭ ساڭلاعى 2008, 2012-2015, 2022 جىلدارى شاشاسىنا شاڭ جۇقتىرمادى. چەحوسلوۆاكيالىق يۆان لەندل (1981-1982, 1985-1987) مەن امە­ري­كالىق پيت سامپراستىڭ (1991, 1994, 1996-1997, 1999) بەس تۋر­نيردە مەرەيى ۇس­تەم بولدى.