استانادا وتباسى كۇنى مەرەكەسىنە وراي كوكتال ساياباعىندا جۇگىرۋ مارافونى ءوتتى, دەپ حابارلايدى Egemen.kz اكىمدىكتىڭ ءباسپاسوز قىزمەتىنە سىلتەمە جاساپ.
پرەزيدەنت جارلىعىمەن 2013 جىلدان باستاپ ءار قىركۇيەكتىڭ ەكىنشى جەكسەنبىسىندە وتباسى كۇنى مەرەكەسى اتاپ وتىلەدى. وتباسىلىق مەرەكەگە وراي, العاش رەت «Koktal run» جۇگىرۋ مارافونى ۇيىمداستىرىلىپ, 3 جاس ەرەكشەلىگى بويىنشا جەڭىمپازدار انىقتالدى.
«بۇگىنگى ءىس-شارامىزدى وتباسى كۇنىنە وراي ۇيىمداستىرىپ جاتىرمىز. وسى ماقساتتا جۇگىرۋ سپورتىن تاڭدادىق. قىسقا قاشىقتىق بولعاندىقتان, كەز كەلگەن تۇرعىننىڭ قاتىسۋ مۇمكىندىگى بولدى. سايىسقا قالامىزدىڭ 200-دەن استام اۋەسقوي سپورتشىسى قاتىستى. وتباسىندا دۇرىس تاربيەنى بويعا ءسىڭىرۋىمىز قاجەت. جۇگىرۋ – سونىڭ كورىنىسى. اتا-انانىڭ جۇگىرگەنىن كورىپ, بالا دا سالاۋاتتى ءومىر سالتىن ۇستاناتىنى انىق», دەدى سارىارقا اۋدانىنىڭ مامانى دامير حيسماتۋللين.
مارافوندا ەرلەر مەن ايەلدەر 5 شاقىرىمعا, ءجاسوسپىرىم ەر بالالار 2 شاقىرىمعا, قىزدار 1 شاقىرىم قاشىقتىققا جۇگىردى. جەڭىمپازدار مەن جۇلدەگەرلەر ديپلوم, مەدال, باعالى سىيلىقپەن ماراپاتتالدى.