مەملەكەت باسشىسىنا «قازاقتەلەكوم» كومپانيالار توبىنىڭ بيىلعى ءبىرىنشى جارتىجىلدىقتا اتقارعان قىزمەتىنىڭ نەگىزگى قارجى-شارۋاشىلىق كورسەتكىشتەرى تۋرالى ەسەپ بەرىلدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قۋانىشبەك ەسەكەەۆتىڭ ايتۋىنشا, ەلىمىزدىڭ تەلەكوممۋنيكاتسيا سالاسىنداعى ءىرى وپەراتورىنىڭ بىلتىرعى وسى كەزەڭمەن سالىستىرعانداعى تابىسى 10 پايىزعا, ال تازا پايداسى 16 پايىزعا وسكەن. 5G جەلىسىن قۇرۋ – «قازاقتەلەكوم» ءۇشىن باسىمدىقتاردىڭ ءبىرى سانالادى. بۇل باستاما اياسىندا 2027 جىلعا قاراي بۇكىل ەل بويىنشا 7 مىڭنان استام بازالىق ستانتسيا سالىنۋعا ءتيىس. وسى جىلدىڭ سوڭىنا دەيىن بەسىنشى بۋىن جەلىسىنىڭ 782 بازالىق ستانتسياسىن سالۋ جوسپارلانىپ وتىر.
«قولجەتىمدى ينتەرنەت» ۇلتتىق جوباسى اياسىندا كومپانيا 1200-گە جۋىق اۋىلدى وپتيكالىق تەحنولوگيالار ارقىلى ينتەرنەت جەلىسىنە قوسۋدى جانە رەسپۋبليكالىق اۆتوجولداردى LTE تەحنولوگياسى بويىنشا ساپالى ينتەرنەتپەن قامتاماسىز ەتۋدى كوزدەپ وتىر.
بۇدان بولەك, مەملەكەت باسشىسىنا ازەربايجانمەن بىرلەسكەن جوبا اياسىندا كاسپي تەڭىزىنىڭ تابانى ارقىلى تالشىقتى-وپتيكالىق جەلى سالۋ جونىندەگى تاپسىرماسىنىڭ ورىندالۋ بارىسى تۋرالى باياندالدى.
سونىمەن قاتار «قازاقتەلەكومعا» بايلانىس ساپاسىنا قاتىستى پروبلەمالاردى شەشۋ جانە قازاقستان قالالارىنداعى كەڭ جولاقتى ينتەرنەت جەلىسىمەن قامتىلماعان ايماقتاردىڭ ماسەلەسىن تەزىرەك رەتكە كەلتىرۋ مىندەتى جۇكتەلدى. قاسىم-جومارت توقاەۆ اۋىلدىق جەرلەردەگى حالىقتىڭ قالا تۇرعىندارى سياقتى زاماناۋي تسيفرلىق قىزمەتتەر مەن ونىمدەرگە قول جەتكىزۋگە ءتيىس ەكەنىن اتاپ ءوتتى. وسىعان بايلانىستى كومپانياعا ءتيىستى ينفراقۇرىلىم قۇرىلىسىنىڭ قارقىنىن ارتتىرۋ تاپسىرىلدى.