ەلىمىزدە جاڭا رۋحاني-تانىمدىق ينتەرنەت-راديو جۇمىسىن باستادى. «Azan» اتتى اقپارات قۇرالى اتىراۋداعى «يمانعالي» ورتالىق مەشىتى جانىنان اشىلىپ وتىر.
Aتىراۋ وبلىستىق ءدىن ىستەرى باسقارماسىنىڭ مەملەكەتتىك تاپسىرىسى اياسىندا اشىلعان راديو قمدب اتىراۋ وبلىستىق وكىلدىگىمەن بىرلەسە جۇمىس ىستەيدى. اشىلۋ سالتاناتىنا قازاقستان مۇسىلماندارى ءدىني باسقارماسى توراعاسىنىڭ ورىنباسارى, نايب ءمۇفتي سانسىزباي قۇربان ۇلى, باس ءمۇفتيدىڭ كەڭەسشىسى كەنجەتاي بايكەمەل ۇلى جانە ساراپتاما ءبولىمىنىڭ مەڭگەرۋشىسى نۇرلان ەۆفرات ۇلى, زيالى قاۋىم وكىلدەرى مەن جۋرناليستەر قاتىستى.
ءىس-شارانى اشقان نايب ءمۇفتي سانسىزباي قۇربان ۇلى اسىل ءدىنىمىزدىڭ قۇندىلىقتارىن ناسيحاتتاپ, قوعامعا پايدالى اقپاراتتارمەن ناسيحاتتاۋدا راديونىڭ ورنى زور ەكەنىن اتاپ ءوتتى. «ادامعا ناسيحات ەڭ ءبىرىنشى قۇلاقپەن ەستۋ ارقىلى جەتەدى. سول سەبەپتى جاڭا ىستەرىڭىز بەرەكەلى بولسىن», دەپ باتاسىن بەردى.
اتىراۋ وبلىسى ءدىن ىستەرى باسقارماسىنىڭ باس مامانى قاھارمان راحمەت ۇلى ءدىن سالاسىنداعى وزەكتى ماسەلەلەردى يمامدارىمىزبەن بىرلەسە وتىرىپ شەشۋ ماقساتىندا جاڭا جوبالار جالعاساتىنىن ايتتى. ال نايب ءمۇفتي سانسىزباي قۇربان ۇلى العاشقى قوناق رەتىندە راديوعا سۇحبات بەردى.
ايتا كەتەيىك, «Azan» – ەلىمىزدە اشىلىپ وتىرعان رۋحاني باعىتتاعى ەكىنشى ينتەرنەت-راديو. بۇعان دەيىن قازاقستان مۇسىلماندارى ءدىني باسقارماسى جانىنان «Munara» راديوسى اشىلىپ, جۇمىس ىستەپ جاتىر.