پرەزيدەنتتىڭ جاڭا ءباسپاسوز حاتشىسى تاعايىندالدى

قاسىم-جومارت توقاەۆ قول قويعان قۇجات 2023 جىلعى 6 قىركۇيەكتە اقوردانىڭ رەسمي سايتىندا جاريالاندى.

«مەملەكەت باسشىسىنىڭ وكىمىمەن نۇرمۇحامەد يسمان ۇلى بايعاراەۆ قازاقستان رەسپۋبليكاسى پرەزيدەنتىنىڭ ءباسپاسوز حاتشىسى لاۋازىمىنا تاعايىندالدى», دەلىنگەن رەسمي حابارلامادا.

نۇرمۇحامەد بايعاراەۆ ءال-فارابي اتىنداعى قازاق ۇلتتىق ۋنيۆەرسيتەتىن «ساياساتتانۋ», «بولاشاق» باعدارلاماسىمەن ۇلىبريتانيانىڭ لانكاستەر ۋنيۆەرسيتەتىن «جوبالاردى باسقارۋ» ماماندىقتارى بويىنشا تامامداعان.

بۇعان دەيىن ول «Qazaqstan» ۇلتتىق تەلەارناسىندا ساياسي-ساراپتامالىق باعدارلامالار مەن الەۋمەتتىك توك-شوۋلار ازىرلەگەن. كەيىن رەسپۋبليكالىق «Egemen Qazaqstan» گازەتى اق باسقارما توراعاسىنىڭ كەڭەسشىسى, باس رەداكتورىنىڭ ورىنباسارى بولدى. سونداي-اق «ايقىن» گازەتىنىڭ باس رەداكتورى قىزمەتىن اتقاردى.

جاڭا قىزمەتكە تاعايىندالعانعا دەيىن ول پرەزيدەنت ءباسپاسوز حاتشىسىنىڭ ورىنباسارى بولدى.