ەگدە ادامداردىڭ جۇمىسقا ورنالاسۋ مۇمكىندىگى شەكتەۋلى. ايتسە دە زەينەتكە جاسى تاياپ قالعان ادامدار مەملەكەتتىك باعدارلاما ارقىلى «ەكى قولعا – ءبىر كۇرەك» تاۋىپ وتىر.
بيىل وڭىردەگى 200-گە جۋىق ادام جۇمىسقا ورنالاستى. بۇل ورايدا جاسى ەلۋدەن اسقان ادامداردىڭ ءتيىمدى جۇمىسپەن قامتىلۋىنا ايرىقشا نازار اۋدارىلىپ وتىر. قازىرگى كۇنى اعا بۋىن وزدەرىنىڭ قولىنان كەلەتىن جۇمىسپەن قامتىلىپ, زەينەت دەمالىسىنا شىققاندا تولىمدى زەينەتاقى الۋ مۇمكىندىگىنە يە بولىپ وتىر.
– «كۇمىس جاس» جوباسى بويىنشا مۇمكىندىكتىڭ ءبارى ەكشەلىپ, تارازى باسىنا تارتىلعاننان كەيىن 189 ادامدى جۇمىسقا ورنالاستىرۋدى جوسپارلاعان ەدىك. بۇل جوسپار 104,2 پايىزعا ورىندالدى. ءبىر جاقسىسى, 33 ادام لايىقتى جۇمىس ىستەپ, زەينەت دەمالىسىنا ءساتتى شىقتى. ءبىزدىڭ ورتالىق ارقىلى جۇمىسقا ورنالاسقان ادامنىڭ 13-ءى تاياۋ ارادا ەڭبەك دەمالىسىنا شىقپاق. ولار مەملەكەتتىك باعدارلاما اياسىندا جاسالىپ جاتقان قامقورلىققا ءدان رازى, – دەيدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ەڭبەك ۇتقىرلىعى ورتالىعىنىڭ ديرەكتورى اسىل مولدياروۆا.
«كۇمىس جاس» جوباسىنا قاتىسۋشىلار ءۇشىن تولەنەتىن ەڭبەكاقىنىڭ 70 پايىزىن ورتالىق سۋبسيديالايدى. اقىل تارازىسىنا سالىپ قاراساڭىز, بۇل ءتاسىل – جۇمىس بەرۋشى ءۇشىن دە كوپ-كورىم دەمەۋ. اسىرەسە زەينەتكە شىعۋعا جاسى تاياپ قالعان ادامدار ءۇشىن ءتيىمدى.
شىندىعىن ايتقاندا, كۇش كەمىپ, قۋات قاشىپ, ەگدە تارتقان ادامداردىڭ جۇمىسقا ورنالاسۋى دا شىرعالاڭ ەكەنى – شىندىق. مىنە, وسى ساتتە ەكى يىنىنەن باسقان جۇكتىڭ سالماعىن جەڭىلدەتىپ, ورايىن كەلتىرۋ قوعامدى ىزگىلەندىرە تۇسەرى داۋسىز.
– الپىستان جاسىم اسقان سوڭ قاراپ قالعانىم سالىمدى سۋعا كەتىرىپ ەدى. اۋداندىق ورتالىققا جۇگىنۋگە تۋرا كەلدى. حالىقتى جۇمىسپەن قامتۋ ورتالىعىنىڭ مامانى بوس جۇمىس ورىندارىن ۇسىندى. سونداي-اق «2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا» جاڭا باعدارلاماسىنا قاتىسۋعا ۇسىنىس جاسادى. نەسى بار, ءبىز جۇمىستان قاشپايمىز عوي. ءسويتىپ, قۇرىلىس سالاسىنان قولىمنان كەلەتىن جۇمىس تابىلدى, – دەيدى اتباسار قالاسىنىڭ تۇرعىنى سەرىكباي قارانوعاەۆ.
ادامداردىڭ بويىندا بولاشاققا دەگەن سەنىم وتى وسىنداي قامقورلىقتىڭ ۇشقىنىمەن لاۋلايدى.
– ماسىل بولعاننان ءوز نانىڭدى ادال ەڭبەگىڭمەن تاپقان جاقسى ەمەس پە؟ وسى ۋاقىتقا دەيىن جۇمىس ىزدەپ تابانىمنان تاۋسىلدىم. «كۇمىس جاس» باعدارلاماسى تۋرالى كەزدەيسوق ەستىگەن ەدىم. جاناشىرلىعى مول جاقسى باعدارلاما ەكەن. ەل قامىن جەگەن وسىنداي قامقورلىق بار جەردە ءبىز ءوزىمىزدى دارمەنسىز سانامايمىز, – دەيدى كوكشەتاۋ قالاسىنىڭ تۇرعىنى الپىسباي كوشىمباەۆ.
«كۇمىس جاس» باعدارلاماسىنىڭ جان جادىراتارلىق شاراپاتى ەگدە ادامداردىڭ ءۇمىت وتىن تۇتاتىپ, كوكىرەگىن ساۋلەلەندىرىپ تۇر.
اقمولا وبلىسى