اتىراۋ قالاسىنىڭ ماڭىندا «ساسىق ساي» اتالاتىن بۋلانۋ الاڭى بار. جايىق وزەنىنىڭ سول جاعالاۋىنداعى سارقىندى سۋ قۇيىلاتىن الاڭ 1945 جىلدان بەرى بار. جاقىندا وسى الاڭعا قوقيقازدار ورالدى.
«اقجايىق» مەملەكەتتىك تابيعي رەزەرۆاتى عىلىم جانە مونيتورينگ ءبولىمىنىڭ عىلىمي قىزمەتكەرى يليا بوفونوۆتىڭ ايتۋىنشا, بۇرىن قوقيقازدار اتىراۋ قالاسىنىڭ ماڭىنا جاقىن كەلگەن ەمەس. مۇنداي جايت وتە سيرەك كەزدەسەدى.
«قازىر قۇستاردىڭ جىلى جاققا ورالاتىن كەزەڭى باستالدى. وسىنداي ميگراتسيا كەزىندە قۇستاردىڭ دەنى ايالدايتىن سۋ ايدىنىن ىزدەيدى. اتىراۋداعى «ساسىق ساي» بۋلانۋ الاڭى قوقيقازداردىڭ ايالدايتىن ورنىنا اينالدى. دەمەك بۇل الاڭدا قوقيقازدارعا تابيعي ازىق – ۇساق شايانتارىزدىلەر بار دەپ بولجاۋعا بولادى. قازىر مۇندا وسىمدىكتەر مەن ميكرواعزالاردى وسىرەتىن ميكروبيولوگيالىق ۇدەرىس ءجۇرىپ جاتىر», دەيدى يليا بوفونوۆ.
ونىڭ پىكىرىنشە, «قىزىل كىتاپقا» ەنگىزىلگەن قوقيقازداردىڭ قونعانىنا قاراعاندا, بۋلانۋ الاڭىنىڭ ەكولوگيالىق جاعدايى جاقسارا باستاعان بولۋى مۇمكىن. ويتكەنى قوقيقاز لاستانعان سۋ ايدىنىنا قونبايدى.
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ مالىمەتىنە سۇيەنسەك, اتىراۋ قالالىق اكىمدىگى 476 گەكتار اۋماقتا ورنالاسقان بۋلانۋ الاڭىن قالپىنا كەلتىرۋ ءۇشىن جوبالىق-سمەتالىق قۇجاتتاماسىن ازىرلەگەن. ەكى جىل بۇرىن ساراپتامانىڭ وڭ قورىتىندىسى الىنعان سوڭ قالپىنا كەلتىرۋ جۇمىسى باستالعان.
«جوبانى ىسكە اسىرۋدىڭ ءبىرىنشى جىلىندا توپىراق تاسىلىپ, بوگەتتەر سالىندى. ارنايى الاڭ دايىندالدى. تۇنبا شوگىندىلەرى جينالىپ, ۋچاسكەلەر قامىستان تازارتىلدى. ال بىلتىر بۋلانۋ الاڭى 355 مىڭ تەكشە مەتردەن استام تۇنبا شوگىندىسىنەن تازارتىلدى. بوگەتتەردى تولتىرۋ, تەگىستەۋ جانە تىعىزداۋ ءۇشىن ينەرتتى ماتەريالدار ساتىپ الىندى. جوبا بويىنشا بۋلانۋ الاڭىن قالپىنا كەلتىرۋدى جىل سوڭىنا دەيىن اياقتاۋ جوسپارلانىپ وتىر», دەپ حابارلادى باسقارما ماماندارى.
اتىراۋ وبلىسى