مەملەكەت باسشىسىنىڭ جولداۋى بويىنشا ەلوردا قالاي داميدى؟

جيىندا ينۆەستيتسيا تارتۋ ماسەلەسىنە ەرەكشە نازار اۋدارىلدى. ەلوردا ينۆەستيتسيا تارتۋدا تاۋ-كەن ەمەس وڭىرلەر اراسىندا كوشباسشى ورىندا تۇر. وسى جىلدىڭ 7 ايىندا ينۆەستيتسيا كولەمى 9,2%-عا ارتىپ, 678,5 ميلليارد تەڭگەگە جەتتى.

پرەزيدەنت اتاپ وتكەندەي, قازىرگى كەزەڭدە ەڭ ماڭىزدى مىندەت ەلدىڭ بەرىك ونەركاسىپتىك قاڭقاسىن قالىپتاستىرۋ بولىپ سانالادى. جىل سوڭىنا دەيىن وڭدەۋ ونەركاسىبى سالاسىنداعى 15 جوبانى قوسا العاندا, جالپى سوماسى 87 ميلليارد تەڭگەگە 25 جوبانى قولدانىسقا بەرۋ جوسپارلانىپ وتىر.

استانا سونىمەن قاتار شاعىن جانە ورتا بيزنەستىڭ وڭىرلىك ەكونوميكاعا قوسقان ۇلەسى بويىنشا كوشباسشى ورنىن ساقتاپ وتىر. كاسىپكەرلىكتى دامىتۋدىڭ ۇلتتىق جوباسى اياسىندا بيىل جىل باسىنان بەرى جالپى سوماسى 44,9 ميلليارد تەڭگەگە 700-گە جۋىق جوباعا قولداۋ كورسەتىلدى.

سونىمەن قاتار تۋريستىك سالانى دامىتۋ ماڭىزدى باعىتقا اينالىپ كەلەدى. ىسكەرلىك جانە مەديتسينالىق ءتۋريزمدى دامىتۋدى جالعاستىرۋ, استانا برەندىن ىلگەرىلەتۋ جانە قاجەتتى ينفراقۇرىلىم مەن سەرۆيس قۇرۋ جوسپارلانىپ وتىر. مەديتسينالىق ءتۋريزمدى دامىتۋ ءۇشىن رەسپۋبليكانىڭ 46 كلينيكاسى مەن مەديتسينالىق ۇيىمدارىن بىرىكتىرەتىن قاۋىمداستىق قۇرىلدى, ول 10 شەتەلدىك قاۋىمداستىقپەن ىنتىماقتاستىق قارىم-قاتىناستا.

15-17 قىركۇيەك ارالىعىندا وتەتىن «Comic Con» فەستيۆالى شىعارماشىلىق يندۋستريانىڭ ماڭىزدى وقيعاسى بولماق جانە 70 مىڭنان استام كەلۋشىنى تارتادى.

مەملەكەت باسشىسى قاسىم-جومارت توقاەۆ تسيفرلاندىرۋ مەن يننوۆاتسيالارعا ەرەكشە نازار اۋداردى. ماقساتى – قازاقستاندى IT-ەلگە اينالدىرۋ. ينتەرنەتتى جاقسارتۋ جۇمىسى كەمشىلىكتەردى ەكى ەسە ازايتۋدى جانە 300 شاقىرىمنان استام تالشىقتى بايلانىس جەلىسىن سالۋدى قامتيدى. سونداي-اق استانالىق IT-كاسىپكەرلەردىڭ جوبالارىن قولداۋ باسىمدىققا يە.

ەنەرگەتيكالىق قاۋىپسىزدىككە توقتالساق, قالانىڭ جاڭا قۇرىلىسىن سەنىمدى ەلەكترمەن قامتاماسىز ەتۋ ءۇشىن جەتى قوسالقى ستانتسيا سالۋ جوسپارلانىپ وتىر. سونداي-اق جەو-3 جانە گاز جىلۋ ستانتسيالارىنىڭ قۇرىلىسى جۇرگىزىلۋدە, بۇل قالانى قوسىمشا جىلۋ قۋاتىمەن قامتاماسىز ەتەدى.

سونداي-اق №2 كارىز-تازارتۋ قۇرىلىسى جوبالانۋدا, ونىڭ باستالۋى بيىل قازان ايىنا جوسپارلانعان, بۇل قالانىڭ شەتىن دە, جاڭا قۇرىلىس اۋداندارىن دا ورتالىقتاندىرىلعان سۋ بۇرۋ جۇيەسىمەن قامتۋعا مۇمكىندىك بەرەدى.

دامۋ تۇجىرىمداماسىنىڭ ماڭىزدى اسپەكتىسى سۋ تاپشىلىعىن جويۋدى, قورشاعان ورتاعا تارايتىن قالدىقتاردى ازايتۋدى جانە قايتا وڭدەلگەن قالدىقتاردىڭ ۇلەسىن 40%-عا دەيىن ارتتىرۋدى ەسەپكە العاندا «جاسىل ەكونوميكاعا» كوشۋ بولىپ سانالادى.

بۇگىنگى كەڭەستىڭ قورىتىندىسى بويىنشا استانا اكىمى جەڭىس قاسىمبەك پرەزيدەنت قاسىم-جومارت توقاەۆتىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىن ىسكە اسىرۋدىڭ ەگجەي-تەگجەيلى جوسپارىن ازىرلەۋدى تاپسىردى.