الماتى وبلىسىندا ءوتىپ جاتقان وقۋ-جاتتىعۋعا كەلگەن قورعانىس ءمينيسترى, گەنەرال-پولكوۆنيك رۋسلان جاقسىلىقوۆ جەكە قۇرامعا پرەزيدەنتتىڭ قازاقستان حالقىنا جولداۋىنىڭ باسىمدىقتارىن جەتكىزدى.
مەملەكەت باسشىسى ايتقان نەگىزگى ماسەلە – ارميانى جوعارى تەحنولوگيالىق قارۋ-جاراقپەن جانە اسكەري تەحنيكامەن قامتاماسىز ەتۋ قاجەتتىلىگى. ەل پرەزيدەنتى قورعانىس-ونەركاسىپ كەشەنىن جان-جاقتى نىعايتۋدى ماڭىزدى ماسەلەلەردىڭ ءبىرى دەدى. دامىعان مەملەكەتتەردە قورعانىس-ونەركاسىپ كەشەنى ۇلتتىق قاۋىپسىزدىكتى قامتاماسىز ەتۋدە شەشۋشى ءرول اتقارادى. سوندىقتان ەڭ ماڭىزدى مىندەت – يمپورتتىق ونىمدەرگە تاۋەلدىلىكتى تومەندەتۋگە مۇمكىندىك بەرەتىن لوكاليزاتسيانىڭ جوعارى ۇلەسى بار ءوندىرىس اينالىمىن قۇرۋ.
قازاق اسكەرىن بروندى تەحنيكامەن, ۇشقىشسىز باسقارىلاتىن قۇرىلعىلارمەن, زاماناۋي اتىس قارۋىمەن قامتاماسىز ەتۋ قاجەت. تەحنيكانى جەدەل جوندەۋ بويىنشا ءوندىرىستى نىعايتۋدى, وتاندىق كاسىپورىنداردى قولداۋدى كۇشەيتۋ قاجەت. بۇل رەتتە مەملەكەت باسشىسى بىزدە قاجەتتى ماتەريالدىق-تەحنيكالىق بازا, قۇزىرەت پەن كادرلار بار دەپ اتاپ ءوتتى.
«ولارعا ءتيىستى ۆەدومستۆولاردىڭ تاپسىرىستارى قاجەت. قازىرگى زامانعى تەحنولوگيالاردى ترانسفەرتتەۋ جانە جاڭا وندىرىستەردى وقشاۋلاۋ جونىندەگى جۇمىس جالعاسۋعا ءتيىس. وتاندىق كاسىپورىنداردى قارجىمەن تىكەلەي قولداۋ تەتىگى – قورعانىس-ونەركاسىپ كەشەنىن دامىتۋدىڭ ارنايى قورى», دەدى ەل پرەزيدەنتى قاسىم-جومارت توقاەۆ. قورعانىس ءمينيسترى قارۋلى كۇشتەر وتاندىق قورعانىس-ونەركاسىپ كەشەنىن بەلسەندى قولدايتىنىن اتاپ ءوتتى.
«قارۋلى كۇشتەردىڭ مەملەكەتتىك قورعانىس تاپسىرىسىن وتاندىق جانە شەتەلدىك قورعانىس-ونەركاسىپ كەشەنىنىڭ كاسىپورىندارى قامتاماسىز ەتەدى, سونىمەن قوسا قارۋلى كۇشتەردەگى قازىرگى قارۋ-جاراق پەن اسكەري تەحنيكانىڭ 50 پايىزدان استامى – وتاندىق ءونىم. قازاقستاندىق وندىرىستەردە اسكەري تەحنيكانىڭ كەڭ سپەكترى, سونىڭ ىشىندە ت-72, بمپ-2 جانە بتر-80 تانكتەرى كۇردەلى جوندەۋدەن وتەدى. ماسەلەن, قۇرلىق اسكەرلەرى ءۇشىن وتاندىق قورعانىس كاسىپورىندارى بروندالعان دوڭگەلەكتى ماشينالاردى جەتكىزەدى. اۋە قورعانىسى كۇشتەرى ءۇشىن «گرانيت» اكتب» جشس بازاسىندا «نۇر» GM-403 3 كوورديناتتىق ستانسالار شىعارىلادى جانە «س-300پس» زەنيتتىك-زىمىراندىق كەشەندەردى كۇردەلى جوندەۋ جۇزەگە اسىرىلادى. «زەنيت» ورال زاۋىتى» اق اسكەري-تەڭىز كۇشتەرى ءۇشىن كوپفۋنكتسيونالدى كەمە قۇراستىرىپ جاتىر. جالپى, قورعانىس مينيسترلىگى وتاندىق قورعانىس-ونەركاسىپ كەشەنىنىڭ كاسىپورىندارىمەن تۇراقتى ءوزارا ءىس-ارەكەت جاساي وتىرىپ, ونى ۇزدىكسىز دامىتۋعا باسىمدىق بەرەدى», دەپ تۇيىندەدى ءسوزىن قورعانىس سالاسىنىڭ باسشىسى.