مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا ەلىمىزدە كادر تاپشىلىعى وزەكتى ماسەلە بولىپ تۇرعانىن, ساپالى ماماندار تاربيەلەۋدى قولعا الۋ كەرەك ەكەنىن ايتتى.
«ايماقتاعى اتقارۋشى بيلىكتىڭ شەشىم قابىلداۋ ىسىنە ازاماتتاردىڭ تىكەلەي قاتىسۋ مۇمكىندىگىن بىرتىندەپ ارتتىرۋ دا ماڭىزدى. اۋىل, كەنت جانە اۋىلدىق وكرۋگ اكىمدەرىن تۇرعىندار وزدەرى سايلاي باستاعانىنا ەكى جىلدان استى. سودان بەرى اۋىلدىق دەڭگەيدەگى اكىمدەردىڭ تورتتەن ءۇشى سايلاندى. ەندى اۋدان جانە وبلىستىق دەڭگەيدەگى قالا اكىمدەرىن سايلاپ كورەمىز», دەدى مەملەكەت باسشىسى.
قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى نۇرلان ءابدىروۆ جۋرناليستەرمەن وتكىزگەن بريفينگتە اۋدان جانە وبلىستىق دەڭگەيدەگى قالا اكىمدەرىن سايلاۋعا قاتىستى پىكىرىن ءبىلدىردى.
ورتالىق سايلاۋ كوميسسياسى اۋماقتىق سايلاۋ كوميسسيالارمەن بىرىگىپ, اۋدان جانە وبلىستىق دەڭگەيدەگى قالا اكىمدەرىن سايلاۋعا ءتيىستى دايىندىق جۇمىستارىن جۇرگىزىپ جاتىر. ءبىز سايلاۋدى وتكىزۋگە تولىق دايىنبىز. قاي وبلىستاردا, اۋدانداردا سايلاۋ وتكىزەتىنىن جەرگىلىكتى وبلىستىق ءماسليحاتتار شەشەدى. ورتالىق سايلاۋ كوميسسياسى بۇل سايلاۋدىڭ قاتاڭ تۇردە زاڭعا ساي وتۋىنە بار كۇشىن سالادى.
ورتالىق سايلاۋ كوميسسياسىنىڭ توراعاسى جۋرناليستەردىڭ سۇراقتارىنا جاۋاپ بەردى. «سايلاۋ ءار وڭىردە ءارتۇرلى مەرزىمدە وتە مە؟» دەگەن ساۋالعا نۇرلان ءابدىروۆ تومەندەگىشە جاۋاپ قايتاردى:
«ارينە سايلاۋدى ۇيىمداستىرۋشى ورگان رەتىندە بىزگە سايلاۋدىڭ ءبىر ۋاقىتتا وتكەنى قولايلى بولار ەدى. ايتسە دە وبلىستىق ءماسليحاتتاردىڭ شەشىمىن كۇتەمىز. زاڭ بويىنشا سايلاۋعا دايىندىق جانە ونى وتكىزۋ مەرزىمى 50 كۇننەن كەم بولماۋ كەرەك. سايلاۋدى كەمىندە ەكى اي ىشىندە وتكىزۋىمىز كەرەك».
«سايلاۋ وسى جىلدىڭ سوڭىنا دەيىن وتە مە؟» دەگەن سۇراققا ورتالىق سايلاۋ كوميسسياسىنىڭ توراعاسى كەلەسىدەي جاۋاپ بەردى:
ء«بىز دە جىلدىڭ سوڭىنا دەيىن وتەدى دەپ بولجاپ وتىرمىز. قالاي بولعاندا دا ءبارى وبلىستىق ءماسليحاتتاردىڭ شەشىمدەرىنە بايلانىستى».
ورتالىق سايلاۋ كوميسسياسى توراعاسىنىڭ پىكىرىنشە, «قازاقستان رەسپۋبليكاسىنداعى سايلاۋ تۋرالى» زاڭعا سايكەس ەلىمىزدە تىركەلگەن ساياسي پارتيالار اۋدان جانە وبلىستىق دەڭگەيدەگى قالا اكىمدەرى سايلاۋىندا وزدەرىنىڭ وكىلدەرىن ۇسىنۋعا قۇقىلى. بىراق ءاربىر وكرۋگكە ءبىر عانا كانديداتىن ۇسىنا الادى. سونداي-اق نۇرلان ءابدىروۆ ەلىمىزدە تاۋەلسىز بايقاۋشىلار ينستيتۋتى جاقسى دامىپ كەلە جاتقانىن, جىلدان جىلعا ولاردىڭ قاتارى دا, قىزمەت ساپاسى دا ارتىپ كەلە جاتقاندىعىن تىلگە تيەك ەتتى.
«تاۋەلسىز بايقاۋشىلار ءوز قىزمەتىن جوعارى دەڭگەيدە زاڭعا ساي وتكىزۋى كەرەك. سول سەبەپتى, قوعامدىق بىرلەستىكتەر ولاردى ساپالى دايىنداپ جاتىر», دەدى ورتالىق سايلاۋ كوميسسياسىنىڭ توراعاسى.