تۇركىستاندا وتكەن «ادىلەتتى قازاقستان – ادال ازامات» ۇلتتىق قۇرىلتايىنىڭ ەكىنشى وتىرىسى بارىسىندا پرەزيدەنت قاسىم-جومارت توقاەۆ 24/7 (تاۋلىگىنە 24 ساعات, اپتاسىنا 7 كۇن) رەجيمدە جۇمىس ىستەيتىن كىتاپحانا قۇرۋ يدەياسىن ايتقانى ءمالىم. وسى ورايدا الماتى قالاسىنىڭ ورتالىقتاندىرىلعان كىتاپحانا جۇيەسىنىڭ ەكى فيليالى 1 قىركۇيەكتەن بەرى تاۋلىك بويى جۇمىس ىستەي باستادى, دەپ جازادى Egemen.kz.
قالا اكىمدىگى ءباسپاسوز قىزمەتىنىڭ اقپاراتىنشا الماتى قالاسىنىڭ مادەنيەت باسقارماسى قالا اكىمدىگىنىڭ قولداۋىمەن الماتى كىتاپحانالارىمەن بىرلەسىپ «Alatau Creative Hub» ورتالىعى جانە جامبىل اتىنداعى قالالىق جاسوسپىرىمدەر كىتاپحانالارىنىڭ بازاسىن اشۋ تۋرالى باستاما كوتەرگەن.
تاۋلىك بويى جۇمىس ىستەيتىن كىتاپحانانىڭ جاڭا جۇمىسى الماتىلىقتارعا بەرىلگەن ىڭعايلىلىق پەن رەسۋرستاردى كەز-كەلگەن ۋاقىتتا پايدالانۋعا مۇمكىندىك بەرىپ وتىر. سونداي-اق اتالعان ءتاسىل شىعارماشىلىقتى ىنتالاندىرۋعا جانە ءارتۇرلى اكتەرلار اراسىنداعى ىنتىماقتاستىقتى جەڭىلدەتۋگە ىقپال ەتەدى.
ەستەرىڭىزگە سالا كەتسەك, ءوز كەزەگىندە Alatau Creative Hub قالادا تالانتتار مەن كرەاتيۆتى يندۋستريالاردى دامىتۋ ءۇشىن قولايلى ورتا قۇرۋ ماقساتىندا «شەكسىز قالا» ستراتەگياسىن ىسكە اسىرۋ اياسىندا اشىلعان. ورتالىق بارلىق تىلەك بىلدىرۋشىلەردىڭ جان-جاقتى دامۋى ءۇشىن بىرەگەي مۇمكىندىكتەر ۇسىنادى. مۇندا وقىرمان ادەبيەتتىڭ باي اسسورتيمەنتى بار كىتاپ بۇرىشتارىمەن تانىسىپ, باعدارلامالاۋدى مەڭگەرە الادى, ونەر مەن شىعارماشىلىق سالاسىنداعى داعدىلارىن دامىتا الادى.