اۋقىمدى ساياسي جاڭعىرۋ جۇمىستارى جۇرگىزىلدى – پرەزيدەنت

«وزدەرىڭىزگە ءمالىم, بىلتىردان بەرى ەلىمىزدە اۋقىمدى ساياسي جاڭعىرۋ جۇمىستارى جۇرگىزىلدى. نەبارى ءبىر جارىم جىلدىڭ ىشىندە كوپتەگەن وزگەرىس جاسالدى. وعان بارشاڭىز كۋا بولدىڭىزدار, رەفورمانى جۇزەگە اسىرۋ ءۇشىن بەلسەندى تۇردە جۇمىس ىستەدىڭىزدەر. قولعا العان شارالار ناتيجەسىندە بيلىك تارماقتارى اراسىندا ءتيىمدى تەپە-تەڭدىك ورنادى. باسقارۋ جۇيەسى ىقپالدى پارلامەنتى بار پرەزيدەنتتىك رەسپۋبليكا ۇلگىسىنە كوشتى. ەلىمىزدە «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» تۇجىرىمداماسى بارىنشا ورنىقتى. «حالىق ۇنىنە قۇلاق اساتىن مەملەكەت» قاعيداتىن ناقتى ىسكە اسىرۋىمىز قاجەت. بۇل جەردە پارلامەنتتىڭ ءرولى ەرەكشە», دەدى پرەزيدەنت.

سونداي-اق ول ادام قۇقىعىن قورعاۋ سالاسىندا ماڭىزدى قادامدار جاسالعانىن ءسوز ەتتى. 

«ادىلدىكتى جانە زاڭ ۇستەمدىگىن ورناتۋ ءۇشىن اۋقىمدى جۇمىس جۇرگىزىلىپ جاتىر. شەشىم قابىلداۋ ۇدەرىسىنە ازاماتتاردىڭ قاتىسۋ مۇمكىندىگى ارتتى. قوعامنىڭ ساياسي مادەنيەتى مۇلدە جاڭا سيپاتقا يە بولدى», دەدى مەملەكەت باسشىسى.