كونستيتۋتسيا كۇنى قارساڭىندا قازاقستان پرەزيدەنتىنىڭ ءارحيۆى ەرەكشە جوبا ۇيىمداستىردى. الماتى قالاسىنىڭ وقۋشىلارىنا ارحيۆ قۇجاتتارىن پايدالانۋ جونىندە شەبەرلىك سىنىبى ءوتىپ, سونىڭ ناتيجەسىندە ارحيۆتە بالالار وزدەرى دايىنداعان كىتاپ, سۋرەت, قۇجاتتىق كورمەلەردى تانىستىردى.
ءىس-شارانى پرەزيدەنت ءارحيۆىنىڭ ديرەكتورى ءاليا مۇستافينا اشىپ, وقۋشىلاردى كونستيتۋتسيا كۇنىمەن قۇتتىقتادى. ول كونستيتۋتسيا مەملەكەتىمىزدىڭ باستى زاڭى ەكەنىن اتاپ ءوتىپ, سونىڭ نەگىزىندە ەلدىڭ مەملەكەتتىك, ساياسي, قوعامدىق, ەكونوميكالىق تەتىكتەرى قالىپتاساتىنىن جەتكىزدى. سونىمەن قاتار ول بالالارعا 1995 جىلى 30 تامىز كۇنى قابىلدانعان قازىرگى قولدانىستاعى كونستيتۋتسيا پرەزيدەنت ارحيۆىندە مەملەكەتتىك ساقتاۋدا ەكەنىن ايتىپ, بۇگىن ولار ءۇشىن تاريحي كۇن ەكەنىن جەتكىزدى.
وقۋشىلاردىڭ بۇل كورمەگە ۇلكەن جاۋاپكەرشىلىكپەن, ىزدەنىسپەن كەلگەنى بايقالادى. بۇعان دەيىن ولار ارنايى شەبەرلىك ساباعى كەزىندە كونستيتۋتسيا كۇنىنە وراي قۇجاتتىق كورمەگە قانداي ىستەردى ۇسىناتىنىن, كىتاپ كورمەسىنە قانداي باسىلىمداردى قوياتىنىن جانە سۋرەت كورمەسىنە ىلىنەتىن شىعارمالاردى ارحيۆ قىزمەتكەرلەرىمەن بىرگە تاڭداسىپ, ۇلكەن قىزىعۋشىلىقپەن جۇمىس ىستەدى. ناتيجەسىندە, قۇجاتتىق كورمەنى №195 جالپى ءبىلىم بەرەتىن مەكتەپتىڭ وقۋشىسى ءامينا تۇرسىنجان, №35 مەكتەپ-گيمنازيانىڭ 9-سىنىپ وقۋشىسى اديا سەرجان, 125 High School مەكتەبىنىڭ 11-سىنىپ وقۋشىسى اميرا يلياس تانىستىردى, ال كىتاپ كورمەسى تۋرالى №195 جالپى ءبىلىم بەرەتىن مەكتەپتىڭ وقۋشىسى ماحاببات مۇقان باياندادى.
«مەنىڭ وتانىم – مەنىڭ بولاشاعىم» تاقىرىبىندا سۋرەت كورمەسىنە وقۋشىلاردان كەلگەن 30-عا جۋىق شىعارما قويىلىپ, ول جونىندە № 204 مەكتەپتىڭ تاريح ءپانىنىڭ مۇعالىمى اقەركە نۇرجانقىزى ايتىپ بەردى. ول ءوز سوزىندە كورمەگە كەلىپ تۇسكەن سۋرەتتەردىڭ بارلىعى بالالاردىڭ تۋعان جەرىنە دەگەن ماحابباتىن, بولاشاققا دەگەن سەنىمىن كورسەتكەنىن اتاپ ءوتتى.
«شەبەرلىك ساباعى كەزىندە كونستيتۋتسياعا قاتىستى كىتاپتار, قۇجاتتارمەن تانىستىق. ءبىز كونستيتۋتسيانىڭ تۇپنۇسقاسىن كوردىك, بۇل ءبىز ءۇشىن ۇلكەن قۋانىش. سەبەبى ەلىمىزدىڭ اتا زاڭىنىڭ قالاي جازىلعانىن, قالاي دايىندالعانىن, قالاي قابىلدانعانىنان حاباردار بولدىق. بۇل ءىس-شارا تاريحىمىزدى ءبىلىپ, ونى قۇرمەتتەۋ كەرەك ەكەنىمىزدى كورسەتتى», دەيدى №25 مەكتەپتىڭ وقۋشىسى رادميلا انيسيموۆا.
جاستارعا پاتريوتتىق تاربيە بەرۋگە, ەلىنىڭ تاريحىن ارحيۆ قۇجاتتارى نەگىزىندە تەرەڭىرەك وقىپ-بىلۋگە باعىتتالعان «بولاشاق ءارحيۆشى» جوباسىن پرەزيدەنت ءارحيۆى 2022 جىلى ەلىمىزدە جاريالانعان بالالار جىلى اياسىندا ۇيىمداستىرعان. بىلتىرعى ءىس-شارادا وقۋشىلار ءارحيۆتىڭ قىزمەتى جانە مىندەتتەرىمەن ەركىن فورماتتا تانىسىپ, ارحيۆشىلەردىڭ كۇندەلىكتى جۇمىسىن كورگەن ەدى. سونىمەن قاتار بالالار پرەزيدەنت ءارحيۆىنىڭ قۇجاتتارى ساقتالعان زەرتحانالىق كورپۋسقا ەكسكۋرسيا جاساپ, قۇجاتتاردى تىگۋ, رەستاۆراتسيالاۋ جانە تسيفرلاندىرۋ سياقتى جۇمىس تۇرلەرى مەن باسقا دا قىزمەتتەرى بويىنشا شەبەرلىك ساعاتتارىن وتكىزدى. ىستەردى قوراپقا ورنالاستىرۋ, كەيىن ىستەردى نومىرلەۋ, قۇجاتتاردى زەرتتەۋ, كونۆەرتتەردى دايىنداۋ, سوڭىندا ارحيۆ قۇجاتتارىنا ءمور باسۋ سىندى ارحيۆ قىزمەتكەرلەرىنىڭ كۇندەلىكتى جۇمىستارىمەن تانىسقان.
جاڭاشىل ءداستۇر بيىل دا جالعاسىن تاپتى. بالالار وقۋ جىلىنىڭ الدىندا ارحيۆكە كەلىپ, كونستيتۋتسيا كۇنىن ەرەكشە فورماتتا اتاپ ءوتتى. ءىس-شارا سوڭىندا بالالارعا «بولاشاق ءارحيۆشى» ديپلومى تابىستالدى. ارحيۆتە وتكەن اقپاراتتىق-تانىمدىق ءىس-شارا بالالاردىڭ جادىندا ۇزاق ساقتالادى دەپ سەنەمىز.