مەدەتتىڭ مەرسيندەگى قولتاڭباسى

ءوڭىر جاستارىنىڭ دەنى «تەڭىز» كەن ورنىنداعى جوبالا­لارعا جۇمىسقا ورنالاسۋدى كوزدەيدى. ويتكەنى مۇندا ءتاۋىر جالاقى الىپ, تاجىريبە جيناۋعا مۇمكىندىك مول. كاسىبي بىلىكتىلىكتى ارتتىراتىن كۋرستارى دا بار. اتالعان كەن ورنىندا تابىس تاپقان قازاقستاندىق جاستاردىڭ ءبىر توبى شەتەلدە جۇمىس ىستەۋگە شاقىرتۋ ال­عان. ارينە, شەتەلدە جۇمىسقا ورنا­لاسۋ وڭاي ەمەس. اسىرەسە حالىقارالىق دەڭگەيدەگى جوبالاردا تاجىريبە جيناعانىن دالەلدەيتىن سەرتيفيكات قاجەت.

كەن ورنىن يگەرىپ جاتقان «تەڭىزشەۆرويل» جشس ءتورت جىل بۇرىن كورپوراتيۆتىك الەۋ­مەتتىك جاۋاپكەرشىلىك باع­دار­لاماسى اياسىندا ارنايى وقى­تۋ كۋرسىن اشقان. سودان بەرى 3 مىڭعا جۋىق جۇمىسسىز ادام وقىتىلىپتى. قازىر سول كۋرستا وقىعان قازاق جاستارىنىڭ كەيبىرى فرانتسيادا, يسپانيادا, ۋرۋگۆاي مەن رەسەيدە, ساۋد ارا­بياسى جانە باسقا ەلدەردەگى جوبالارعا جۇمىسقا ورنالاسقان. ماسەلەن, ءبىر توپ قازاقستاندىق جاس جىگىت تۇركياداعى مەرسين قا­لاسىنىڭ ماڭىندا بوي كوتە­رىپ جاتقان اتوم ەلەكتر ستان­سا­سىنىڭ قۇرىلىسىندا جۇمىس ىستەپ ءجۇر. ولاردىڭ ءبارى «تەڭىز» كەن ورنىنداعى ءۇشىنشى بۋىن زاۋىتىنىڭ قۇرىلىسىنا قاتى­سىپ, تاجىريبە جيناعان.

سونىڭ ءبىرى – مەدەت ءداۋىتوۆ. بۇعان دەيىن «تەڭىز» كەن ورنىن­داعى جوبانىڭ مەردىگەر كاسىپ­ورىندارىندا جۇمىس ىستەگەن. جوبا قۇرىلىسىنىڭ اياقتالۋىنا بايلانىستى قىسقارتۋعا ىلىككەن. جاسى ءالى وتىزعا تولماعان جاس جىگىت ارنايى كۋرسقا جازىلىپ, ءتورت اي بويى ارگونمەن دانە­كەرلەۋشى ماماندىعىن مەڭگەر­گەن. دوسىنىڭ كومەگىمەن تۇر­كيا­داعى اتوم ستانساسىنىڭ قۇ­رى­لىسىنا جۇمىسقا ورنالاسقان.

«اتوم ەلەكتر ستانساسىنىڭ قۇرىلىسىندا جۇمىس ىستەۋ تۋرالى ويلاعان جوق ەدىم. ويتكەنى مەن ءۇشىن شەتەلدە جۇمىس ىستەۋ – ورىندالۋى قيىن ارماننىڭ ءبىرى. الايدا «تەڭىزدە» جيناعان تاجىريبەم بار, وعان ارنايى كۋرستى بىتىرگەنىم تۋرالى سەرتيفيكاتىمدى الىپ, تۇركيا ەلىنە جۇمىسقا كەلدىم. قازىر اتوم ەلەكتر ستانساسىنىڭ قۇ­رى­لىسىنا قولتاڭبامدى قال­دى­رىپ ءجۇرمىن. شەتەلدە جۇ­مىس ىستەۋدىڭ ارتىقشىلىعى كوپ. بى­رىن­شىدەن, تاجىريبەنى تو­لىق­تىرا تۇسەمىن. ەكىنشىدەن, شەت ءتىلىن مەڭگەردىم. ەڭ باستى­سى, وزگە ەلدىڭ تاريحىمەن, مادەنيە­تىمەن تەرەڭىرەك تانىسىپ, تانىم كوكجيەگىمدى كەڭەيتۋگە مۇمكىندىك الدىم», دەيدى مەدەت.

وزگە ەلدىڭ اتى – وزگە ەل. كۇن رايى دا, تابيعاتى دا, ءتىپتى ادامدارىنىڭ مىنەز-قۇلقى دا وزگەشە بولعاندىقتان, ءار قا­دام­دى اڭداپ باسۋعا تۋرا كەلەدى. م.ءداۋىتوۆتىڭ ايتۋىنا قاراعاندا, تۇرىك ءتىلىن بىلمە­گەندىكتەن, باستاپقىدا قيىن­دىققا كەزىككەن.

«ەلىمىزدەگى «تەڭىز» كەن ورنى كوپتەگەن ادامعا تاجىريبە جيناۋ, شەت ءتىلىن مەڭگەرۋ تۇرعىسىندا جاڭا مۇمكىندىك اشقانى داۋ­سىز. بىراق ونى پايدالانا ال­ماعاندار بار. ماسەلەن, كەن ورنىندا قاۋىپسىزدىك تەحنيكاسىن ساقتاۋدىڭ ماڭىزىن, جۇمىسقا جاۋاپكەرشىلىكپەن قاراۋدى, ارىپتەستەرىمىزگە قامقورلىق تانىتۋدى ۇيرەندىك. ەندى تۇركيادا سونىڭ جەمىسىن كورىپ ءجۇرمىز. مەرسين قالاسىنداعى اتوم ەلەكتر ستانساسى جوباسىنىڭ قاۋىپ­­سىزدىك ەرەجەلەرى «تەڭىز» كەن ورنىنداعى تالاپقا ۇقساي­دى», دەيدى م.ءداۋىتوۆ.

ونىڭ ايتۋىنا قاراعاندا, مەرسين شاھارىندا سالىنىپ جاتقان اتوم ەلەكتر ستانساسىندا ءتورت ەنەرگوبلوك بار. ونىڭ ارقايسىسىندا قۋاتى 1 200 مۆت بولاتىن رەاكتور ورناتىلادى. اتوم ەلەكتر ستانساسى جىلىنا شامامەن 35 ملرد كۆت ەنەرگيا وندىرەدى. جوبانىڭ قۇنى – شامامەن 20 ملرد دوللار.

مەدەت قازاقستانعا كۇزدە ورالۋدى جوسپارلاپ وتىر. الەمدىك دەڭگەيدەگى جوبادا جي­نا­عان تاجىريبەسىن ەلىمىزدىڭ ەنەر­گەتيكا سالاسىن دامىتۋعا قول­دانىپ كورمەك.

اتىراۋ وبلىسى