ورالعا جاڭا اۆتوبۋستار كەلدى

ورال قالاسىندا كۇن سايىن 300-گە جۋىق قوعامدىق كولىك كوشەگە شىعادى. بىلتىر 79 اۆتوبۋس جاڭادان ساتىپ الىنسا, بيىل 50 كولىك جاڭارتىلادى ەكەن. قالا اكىمدىگى وبلىس ورتالىعىندا جولاۋشى تاسىمالىمەن اينالىساتىن مەكەمەلەردەن جىل سايىن اۆتوپاركتىڭ كەمىندە 10 پايىزىن جاڭارتىپ تۇرۋدى تالاپ ەتەدى. ورال قالاسىنىڭ اكىمى ميرجان ساتقانوۆ «وسى جوسپار ورىندالسا, 5 جىل ىشىندە توزىعى جەتكەن كونە كولىكتەن قۇتىلامىز» دەپ وتىر.

«بۇگىندە ورال قالاسىنداعى اۆتوبۋس پاركتەرىنىڭ توزىعى 35 پايىزعا جەتكەن. ەڭ قيىنى – قاراجات ماسەلەسى. كاسىپكەرلەر ەكىنشى دەڭگەيلى بانكتەرگە كەپىل قويىپ, نەسيە الادى. بىل­تىردان بەرى بيۋدجەتتەن بولىنەتىن سۋبسي­ديانىڭ مولشەرىن كوبەيتتىك. جىل سايىن بۇل سالاعا وبلىستىق بيۋدجەتتەن 3,3 ملرد تەڭگە ءبولىنىپ كەلسە, الداعى ءۇش جىل بويى جالپى 15 ملرد تەڭگە بەرىل­مەك. تۇرعىندارعا قولايلى بولۋى ءۇشىن بارلىق جاعدايدى جاساۋى­مىز كەرەك. ارينە, ەڭ الدىمەن, ساپالى جول سالعانىمىز ءجون. بيىل قالا­دا 50-دەن استام ايالداما سالىنىپ جاتىر. سەبەبى شا­ھارداعى 150-گە تارتا ورىندا ەشقانداي ايالداما جوق. اۆتوبۋس جۇرگىزۋشىلەرىنىڭ ورتاشا جالاقىسى – شامامەن 310 000 مىڭ تەڭگە. اشىعىن ايتۋ كەرەك, قازىر كولىك جۇرگىزۋشىلەرى تاپشى. ال تاجىريبەسىز مامانداردى جۇ­مىسقا الۋ قاۋىپتى», دەيدى ميرجان مۇنايدار ۇلى.

«ورالاۆتوترانس» جشس جەلىگە قو­سىپ وتىرعان سۋ جاڭا «Yutong» جانە «ۆەكتور NEXT» ماركىلى اۆتوبۋستار –  جو­لاۋشىلارعا ىڭعايلى, زاماناۋي ۇلگى­دە جاساقتالعان كولىك. «Yutong»-ءتىڭ 8 باقى­لاۋ كامەراسى, كونديتسيونەرى, مۇگە­دەكتەر ارباسىن كوتەرىپ-تۇسىرەتىن قون­دىر­عىسى بار. بۇل كولىكتەردىڭ باعا­سى شامامەن 80 ملن جانە 40 ملن تەڭگە تۇرادى ەكەن. بارلىق اۆتوبۋس قالالىق اكىمدىك بولگەن سۋبسيدياعا جانە ەكىن­شى دەڭ­گەيلى بانكتەردىڭ نەسيەسىنە الىنعان.

باتىس قازاقستان وبلىسى