پرەمەر-ءمينيستردىڭ ورىنباسارى – ەڭبەك جانە حالىقتى الەۋمەتتىك قورعاۋ ءمينيسترى, V دۇنيەجۇزىلىك كوشپەندىلەر ويىندارىنا دايىندىق جونىندەگى ۇيىمداستىرۋ كوميتەتىنىڭ توراعاسى تامارا دۇيسەنوۆا اتالعان ويىندارعا دايىندىق بويىنشا وتىرىس وتكىزدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
وتىرىستا استانا قالاسى اكىمدىگى مەن مادەنيەت جانە سپورت مينيسترلىگىنىڭ استانانىڭ سپورت ينفراقۇرىلىمىنىڭ شاراعا دايىندىق دەڭگەيى تۋرالى اقپاراتى تىڭدالدى.
وتىرىس بارىسىندا ت.دۇيسەنوۆا V دۇنيەجۇزىلىك كوشپەندىلەر ويىندارى اياسىندا جارىستار وتكىزۋ ءۇشىن استانا قالاسىندا قولدانىستاعى سپورت نىساندارى پايدالانىلاتىنىن, ارنايى جاڭا نىساندار سالىنبايتىنىن اتاپ ءوتتى.
ەلوردا اكىمدىگىنىڭ دەرەكتەرىنە سايكەس وسى حالىقارالىق ءىس-شاراعا دايىندىق اياسىندا «استانا ارەنا» ستاديونى, «الاۋ» مۇز سارايىنا جوندەۋ جۇرگىزىلەدى. سونداي-اق بيۋدجەتتەن تىس قاراجات ەسەبىنەن ەلوردالىق «قازانات» يپپودرومىن رەكونسترۋكتسيالاۋ جوسپارلانعان.
ەسكە سالايىق, 2024 جىلى V دۇنيەجۇزىلىك كوشپەندىلەر ويىندارىن وتكىزۋ ەستافەتاسى قازاقستانعا بەرىلدى. دۇنيەجۇزىلىك كوشپەندىلەر ويىندارى (World Nomad Games) – ەتنيكالىق سپورت تۇرلەرى بويىنشا حالىقارالىق جارىس. وعان ورتالىق ازيانىڭ تاريح بويىنشا كوشپەلى حالىقتارىنىڭ ۇلتتىق ويىندارى نەگىز بولدى.