ءماجىلىس دەپۋتاتى جاناربەك ءاشىمجان ەڭبەكشىقازاق اۋدانىنا كەلگەن ءىسساپارىن مۇعالىمدەرمەن كەزدەسۋدەن باستادى. ساياجاي ماڭىنداعى راحات №1 ورتا مەكتەپتىڭ ۇستازدارىمەن جۇزدەسكەن «Amanat» پارتياسى فراكتسياسىنىڭ مۇشەسى ەركىن فورماتتا اشىق اڭگىمە تيەگىن اعىتتى.
مۇعالىمدەر ءبىرىنشى كەزەكتە ساياجايعا اۋىل مارتەبەسىن بەرىپ, ينفراقۇرىلىم جۇرگىزۋ ماسەلەسىن كوتەردى. دەپۋتاتتىڭ ايتۋىنشا, بۇل ماسەلە رەسپۋبليكا كولەمىندە كوتەرىلىپ, ماجىلىستە قارالۋدا ەكەن.
اۋداندىق ءبىلىم ءبولىمىنىڭ باسشىسى جارقىن نۇرعالىموۆ بالالاردى تاسىمالداپ وقىتۋعا دا وسى ساياجاي مارتەبەسى كەدەرگى كەلتىرەتىنىن اشىق ايتتى. سەبەبى, زاڭدا مەكتەپ جوق ەلدى مەكەندەردەن بالالاردى تاسىمالداۋعا قارجى بولىنەدى. ال زاڭ جۇزىندە ساياجايلاردا ەلدى مەكەن مارتەبەسى جوق. سوعان قاراماستان ءبىلىم ءبولىمى زاڭدى بەلشەسىنەن باسىپ, ساياجاي بالالارىن ءبىلىم وشاقتارىنا تاسىمالدايدى. سول ءۇشىن زاڭ قاداعالاۋشى ورگاندار ءبىلىم بولىمىنە ايىپپۇل دا سالعانىن جاسىرىپ قالمادى. ساياجايلىقتاردىڭ وزەكتى ماسەلەسىنە قۇلاق اسقان ماجىلىسمەن بۇل تۇيىتكىلدى وڭتايلى شەشۋ جولدارى قاراستىرىلىپ جاتقانىن جەتكىزدى.
سونىمەن قاتار دەپۋتات ساياجاي ىرگەسىندەگى 900 ورىندىق مەكتەپتىڭ قۇرىلىسىمەن تانىستى. مەردىگەر مەكەمە – «Bazis Construction» جشس, تاپسىرىس بەرۋشى – بولات وتەمۇراتوۆ اتىنداعى قور.
«جالپى سوماسى 7 ملرد تەڭگە بولاتىن ءبىلىم وشاعى زامان تالابىنا ساي قۇرال-جابدىقتارمەن قامتاماسىز ەتىلەدى. قۇرىلىس جۇمىسىنا ءبىز تولىقتاي وتاندىق ونىمدەردى قولدانىپ جاتىرمىز. نىساننىڭ قۇرىلىس دەڭگەيىن اپتا سايىن جەرگىلىكتى حالىق قالاۋلىلارى باقىلايدى. عيمارات كەلەر جىلدىڭ سوڭىنا قاراي تولىعىمەن پايدالانۋعا بەرىلەدى», دەدى مەردىگەر مەكەمەنىڭ وكىلدەرى.
قۇرىلىس جۇمىسىن ارالاپ كورگەن ماجىلىسمەن بىرقاتار ماسەلەگە نازار اۋداردى. «مەردىگەرلەر مەكتەپتى ۋاقىتىندا اياقتاۋعا ءتيىس», دەدى ج.ءاشىمجان.
بۇگىندە №1 راحات ورتا مەكتەبىنە وقۋشىلار سىيماي الەك. ونىڭ ۇستىنە 1 500-گە جۋىق ساياجايلىق بالالار ەسىك قالاسىنا تاسىمالدانادى. اتالعان مەكتەپ پايدالانۋعا بەرىلسە, بىرنەشە ماسەلە وڭ شەشىمىن تاپپاق.
قازىرگى تاڭدا ساياجاي ماڭىندا زامان تالابىنا ساي تاعى ءبىر ءبىلىم وشاعى بوي كوتەرىپ كەلەدى. جالپى قۇنى 5 ملرد تەڭگە بولاتىن 1 475 وقۋشىعا ارنالعان ورتا مەكتەپ قۇرىلىسى جۇرگىزىلىپ جاتىر. جەكە ينۆەستوردىڭ قارجىسىنا سالىنىپ جاتقان مەكتەپ وسى جىلدىڭ جەلتوقسان ايىندا پايدالانۋعا بەرىلەدى دەپ جوسپارلانىپ وتىر.
قۇرىلىس بارىسىمەن تانىسقان دەپۋتات مەردىگەر مەكەمە «Kapital construction» جشس-ءنىڭ وكىلدەرىنە قۇرىلىس ساپاسىنا باسا نازار اۋدارۋدى تاپسىردى. ءوز كەزەگىندە مەردىگەر قۇرىلىس بارىسىندا تۋىنداپ جاتقان قيىندىقتاردى دا ايتىپ ءوتتى. سوزىنە سۇيەنسەك, عيماراتقا اۋىز سۋ, كوگىلدىر وتىن تارتۋ مەن كارىز جۇيەسىنە قوسىلۋ قيىندىق تۋدىرىپ وتىر. سۋ مەن گازدى ەسىك قالاسىنىڭ تومەنگى جاعىنان الۋ كەرەك. اتالعان جۇمىستارعا قوسىمشا 280 ملن تەڭگەگە جۋىق قارجى جۇمسالادى.
ساپار سوڭىندا ماجىلىسمەن ەسىك قالاسىنداعى 1 500 ورىندىق مەكتەپكە ارنايى ات باسىن بۇردى. بۇگىنگى تاڭدا وقۋ ورداسىنىڭ قۇرىلىس جۇمىستارى اياقتالعان. مەردىگەر مەكەمە «BI Global» جشس-ءنىڭ وكىلدەرى جاڭا وقۋ جىلىندا پايدالانۋعا بەرىلەتىنىن ايتتى.
ءبىلىم ءبولىمى باسشىسىنىڭ ايتۋىنشا, مەكتەپ پايدالانۋعا بەرىلسە, ەسىك قالاسىنداعى 3 اۋىسىمدا ءبىلىم بەرەتىن مەكتەپتەردىڭ ماسەلەسى تولىعىمەن شەشىلەدى.
الماتى وبلىسى قۇرىلىس باسقارماسىنىڭ تاپسىرىسىمەن سالىنىپ جاتقان ءبىلىم ورداسىنىڭ قۇرىلىسىنا 5 ملرد 700 ملن تەڭگەدەن استام قارجى بولىنگەن.
الماتى وبلىسى