شەتەلدەگى تانىمال وقۋ ورىندارىنا وقۋعا شاقىرتۋ العان اتىراۋلىق شاكىرتتەر از ەمەس. ماسەلەن, بيىل مەكتەپ بىتىرگەن 18 ورەنگە اقش, گەرمانيا, كانادا, يتاليا, ماجارستان, تۇركيا, چەحيا, ەستونيا سەكىلدى ەلدەردىڭ تاڭداۋلى ۋنيۆەرسيتەتتەرى قىزىعۋشىلىق تانىتتى.
سونداي تۇلەكتىڭ ءبىرى – اسقار المۇحامەتوۆ اتىراۋ قالاسىنداعى نازارباەۆ زياتكەرلىك مەكتەبىن بىتىرگەن. وعان الەمنىڭ ءتورت جوعارى وقۋ ورنىنان وقۋعا ۇسىنىس تۇسكەن. قازاق ۇلانىنا شاقىرتۋ جىبەرگەندەردىڭ قاتارىندا UC Berkeley, Columbia, University of Toronto, Georgia Tech جانە KAIST ۋنيۆەرسيتەتتەرى بار.
– مەن كومپيۋتەرلىك عىلىم باعىتىن تاڭدادىم. قازىر ەكونوميكانىڭ بارلىق سالاسىن بۇل باعىتسىز ەلەستەتۋ مۇمكىن ەمەس. ەندى وسى سالادا جوعارى ءبىلىم الۋدى كوزدەدىم. سول سەبەپتى الەمدەگى ۇزدىك وقۋ ورنىنىڭ ءبىرى UC Berkeley ۋنيۆەرسيتەتىنە وقۋعا بارۋعا شەشىم قابىلدادىم. ويتكەنى اقش-تاعى كاليفورنيا شتاتىنىڭ بەركلي قالاسىندا ورنالاسقان بۇل ۋنيۆەرسيتەت كومپيۋتەر جانە IT تەحنولوگيالار, ەكونوميكا, فيزيكا سالالارى بويىنشا الەمگە ايگىلى وقۋ ورنىنىڭ كوش باسىندا تۇر, – دەيدى اسقار.
ال پولينا ۆارداشكو كانادانىڭ وتتاۆا قالاسىنداعى Carleton University-ءنىڭ ستۋدەنتى اتانعالى وتىر. بۇل – ونىڭ كوپ جىلعى ارمانى.
– جوعارى ءبىلىم الاتىن وقۋ ورنىن تاڭداۋدا جاڭىلماۋ قاجەت. ويتكەنى مىقتى مامان بولۋ ءۇشىن باسەكەگە قابىلەتتى ۇستازدارى, عىلىمي-زەرتحانالىق ورتالىعى بار ۋينۆەرسيتەتتەردەن ءدارىس الۋدىڭ ماڭىزى زور. وسى تۇرعىدان ايتقاندا, كاناداداعى جوعارى ءبىلىم بەرۋ سالاسىنا قىزىعاتىن ەدىم. ەندى جاقىندا وسى ەلدەگى تانىمال ۋنيۆەرسيتەتتىڭ بيوحيميا جانە بيوتەحنولوگيا فاكۋلتەتىندە ءبىلىم الۋدى باستايمىن, – دەپ قۋانىشىن ءبولىستى پولينا.
اتىراۋ وبلىسى