قازاقستاندىقتارعا مۇگەدەكتىگى جانە اسىراۋشىسىنان ايىرىلۋى بويىنشا جاردەماقىلار مەن الەۋمەتتىك تولەمدەر تۇرىندە شامامەن 326,9 ملرد تەڭگە تولەندى, دەپ جازادى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
جىل باسىنان بەرى مۇگەدەك جاندار مەن اسىراۋشىسىنان ايىرىلعان ازاماتتارعا مەملەكەتتىك الەۋمەتتىك جاردەماقى تولەۋ ماقساتىندا رەسپۋبليكالىق بيۋدجەتتەن 291 ملرد تەڭگە جۇمسالدى. ودان بولەك مەملەكەتتىك الەۋمەتتىك ساقتاندىرۋ قورىنان ەڭبەككە قابىلەتتىلىگىنەن ايىرىلۋ جانە اسىراۋشىسىنان ايىرىلۋ بويىنشا شامامەن 35,9 ملرد تەڭگە سوماسىنا الەۋمەتتىك تولەمدەر جۇزەگە اسىرىلدى.
2023 جىلعى 1 تامىزداعى جاعداي بويىنشا مۇگەدەكتىگى بويىنشا ءماج الۋشىلار سانى شامامەن 536,9 مىڭ ادامدى, اسىراۋشىسىنان ايىرىلۋ جاعدايى بويىنشا – شامامەن 186,7 مىڭ ادامدى قۇرايدى.
مۇگەدەكتىگى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىكتىڭ توبىنا جانە سەبەبىنە, سونداي-اق ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» زاڭدا بەلگىلەنگەن ەڭ تومەنگى كۇنكورىس دەڭگەيىنىڭ شاماسىنا بايلانىستى بولادى.
اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى قايتىس بولعان اسىراۋشىنىڭ اسىراۋىنداعى ادامداردىڭ سانىنا, قايتىس بولۋ سەبەپتەرىنە جانە ەڭ تومەنگى كۇنكورىس دەڭگەيىنە بايلانىستى بولادى.
«مۇگەدەكتىگى بويىنشا جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى 2023 جىلعى 1 قاڭتاردان باستاپ ەڭ تومەنگى كۇنكورىس دەڭگەيىنىڭ ۇلعايۋىنا بايلانىستى 8,5%-عا ءوستى. قر الەۋمەتتىك كودەكسىنىڭ كۇشىنە ەنۋىنە بايلانىستى 2023 جىلعى 1 شىلدەدەن باستاپ ءماج مولشەرى ورتا ەسەپپەن قوسىمشا 14,5%-عا يندەكستەلدى. ماسەلەن, 2023 جىلعى 1 شىلدەدەن باستاپ جالپى اۋرۋدان مۇگەدەكتىگى بويىنشا ءماج مولشەرى 1-توپ ءۇشىن 89 248 تەڭگەنى, 2-توپ ءۇشىن – 71 398 تەڭگەنى, 3-توپ ءۇشىن – 48 681 تەڭگەنى قۇرايدى», دەلىنگەن ۆەدومستۆو حابارلاماسىندا.