پرەزيدەنتكە ەلىمىزدەگى كريمينوگەندىك احۋال جونىندە جانە 30 ماۋسىمدا وتكەن ىشكى ىستەر مينيسترلىگىنىڭ كەڭەيتىلگەن القا وتىرىسىندا بەرىلگەن تاپسىرمالاردىڭ ورىندالۋ بارىسى تۋرالى مالىمەت بەرىلدى, دەپ حابارلايدى Egemen.kz اقورداعا سىلتەمە جاساپ.
كەزدەسۋدە قاسىم-جومارت توقاەۆقا قىلمىس سانىنىڭ ازايعانى جونىندە باياندالدى. مارات احمەتجانوۆتىڭ ايتۋىنشا, كىسى ءولتىرۋ, بۇزاقىلىق, ۇرلىق, قاراقشىلىق, توناۋ, مال ۇرلىعى جانە دەنساۋلىققا اۋىر زاقىم كەلتىرۋ جانە باسقا دا قىلمىستار ايتارلىقتاي ازايعان.
پرەزيدەنتكە ەلوردادا جۇزەگە اسىرىلىپ جاتقان CyberPol جوباسىنىڭ ناتيجەلەرى تانىستىرىلدى. جوبا ينتەرنەت-الاياقتىققا قارسى ءىس-قيمىلدى جەتىلدىرۋگە باعىتتالعان.
سونىمەن قاتار مينيستر ەسىرتكى قىلمىسىنا قارسى كۇرەس باعىتىندا جۇرگىزىلىپ جاتقان جۇمىستاردىڭ قورىتىندىسى تۋرالى ەسەپ بەردى. جىل باسىنان بەرى قۇقىق قورعاۋ جانە ارناۋلى ورگانداردىڭ بىرلەسكەن كۇش-جىگەرىنىڭ ناتيجەسىندە 14,3 توننا ەسىرتكى, سونىڭ ىشىندە 71,5 كگ گەروين, 652 كگ سينتەتيكالىق ەسىرتكى تاركىلەندى. ءىىم كۇشتەرى 52 ەسىرتكى زەرتحاناسىن جويىپ, 85 توننا پرەكۋرسور تاركىلەدى.
بۇدان بولەك, ۇيىمداسقان قىلمىستىق توپتاردىڭ ارەكەتتەرى بويىنشا 37 قىلمىستىق ءىس تەرگەلىپ جاتىر. ادام ساۋداسىنا بايلانىستى 111 قىلمىس انىقتالدى.
پرەزيدەنتكە وتباسىلىق-تۇرمىستىق سالادا زورلىق-زومبىلىق جاساعاندارعا قاتىستى جاۋاپكەرشىلىكتى قاتاڭداتۋ شارالارى تۋرالى دا ايتىلدى. قازىر مۇنداي قۇقىقبۇزۋشىلىقتار جابىرلەنۋشىنىڭ ارىز-شاعىمىنسىز تىركەلىپ, ءىس قوزعالا بەرەدى.
مەملەكەت باسشىسىنا جول-كولىك وقيعالارىنىڭ الدىن الۋ جانە شەتەلدىك اۆتوكولىكتەردى زاڭداستىرۋ جۇمىستارىنىڭ ناتيجەلەرى تۋرالى باياندالدى.
كەزدەسۋ سوڭىندا پرەزيدەنت قۇقىق قورعاۋ ورگاندارىنا ازاماتتاردىڭ كونستيتۋتسيالىق قۇقىقتارىنىڭ قاتاڭ ساقتالۋىن قامتاماسىز ەتۋدى تاپسىردى. سونىمەن بىرگە قاسىم-جومارت توقاەۆ ءىىم باسشىلىعىنا قۇقىقتىق ءتارتىپ پەن قوعامدىق قاۋىپسىزدىك دەڭگەيىن ودان ءارى ارتتىرۋ جونىندە بىرقاتار مىندەت جۇكتەدى.