اباي كۇنى مەرەكەسىنە وراي ۇلتتىق مۋزەي قورىنا قۇندى جادىگەر سانالاتىن ساماۋرىن تابىس ەتىلدى. تۋلا قالاسىندا جاسالعان بۇل ساماۋرىنمەن ەرتىستىڭ جاعاسىندا 1893 جىلى پاروم كۇتىپ تۇرعان كەزدە اباي شاي ىشكەن.
اتالعان جادىگەردى ۇلتتىق مۋزەيگە تاپسىرۋ راسىمىندە مادەنيەت جانە سپورت ۆيتسە-ءمينيسترى ارمان جۇدەباەۆ جينالعانداردى اباي كۇنىمەن قۇتتىقتاپ, جىلى لەبىزىن ءبىلدىردى.
– بۇگىن ۇلتتىق مۋزەيدىڭ قورى ۇلى اقىنعا قاتىستى تاعى ءبىر جادىگەرمەن تولىعىپ وتىر. بۇل سەمەي قالاسىندا مەتسەنات بەكباي بايىسوۆتىڭ كەرۋەن سارايىندا تۇرعان, اباي قۇنانباي ۇلى, باسقا دا قازاق زيالىلارى شاي ىشكەن ساماۋرىن. اتالعان تاريحي جادىگەردىڭ تاعى ءبىر قۇندىلىعى سەمەيدە اباي اتىنداعى العاشقى مۋزەي اشىلعاندا سول جەردەگى ەكسپوزيتسياعا ۇلى اقىن پايدالانعان قۇندى بۇيىم رەتىندە قويىلعان. سوندىقتان بۇل تاريحي جادىگەردىڭ ەلىمىزدەگى ەڭ ءىرى مادەني مەكەمەسى – ۇلتتىق مۋزەيگە تاپسىرىلۋى كەلەشەك ۇرپاق ءۇشىن ماڭىزدى دەپ سانايمىز, – دەدى ول.
ونىڭ ايتۋىنشا, اتالعان ساماۋرىندى قوسا العاندا ۇلى اقىنىمىزعا قاتىستى 43 قۇندى جادىگەر بار.
ۆيتسە-مينيستر سالا اتىنان حالىقارالىق مادەنيەت پەن ونەردى قولداۋ قورىنا العىس ءبىلدىردى.
– مادەنيەت جانە سپورت مينيسترلىگىنىڭ اتىنان اباي اتىنداعى حالىقارالىق مادەنيەت پەن ونەردى قولداۋ قورىنا قۇندى جادىگەردى بىزگە اماناتقا تاپسىرعانى ءۇشىن العىس بىلدىرەمىن, – دەدى ارمان جۇدەباەۆ.
ءىس-شارا بارىسىندا اباي اتىنداعى حالىقارالىق مادەنيەت پەن ونەردى قولداۋ قورى, قوعامدىق كەڭەسىنىڭ شەشىمىمەن بەلگىلى مەتسەنات بەكباي بايىسوۆتىڭ نەمەرەسى اسقار بەكباەۆ «اباي» مەرەيتويلىق مەدالىمەن ماراپاتتالدى.
اتالعان ءىس-شارانى ۇيىمداستىرۋداعى ماقسات – ۇلتىمىزدىڭ ۇلى ويشىلى اباي قۇنانباي ۇلىنىڭ ۇلتتىق يدەيالارعا تولى اسىل-مۇرالارىن دارىپتەۋ, مۋزەيگە كەلۋشىلەردىڭ نازارىنا قۇندى جادىگەردى كورۋىنە مۇمكىندىك بەرۋ, كەيىنگى ۇرپاقتىڭ تاعزىم ەتىپ, ۇلى اقىننىڭ شىعارماشىلىعى مەن ەڭبەگىنە دەگەن قىزىعۋشىلىعىن ارتتىرۋ.