اباي وبلىسىندا جۇرگىزىلگەن زەرتتەۋ جۇمىستارىنىڭ ناتيجەسىندە وسىدان ءتورت مىڭ جىل بۇرىنعى قولا ءداۋىرىنىڭ دالا پيراميداسى تابىلدى, دەپ حابارلايدى Egemen.kz ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ءباسپاسوز قىزمەتىنە سىلتەمە جاساپ.
«دالا پيراميداسى وتە دالدىكپەن سالىنعان: التى قىرلى. ءاربىر قىرىنىڭ اراسى ون ءۇش مەتر جانە سەگىز قاتار تاسپەن قالانعان. ورتاسىندا بىرنەشە شەڭبەرلەرى بار. بۇل – وتە كۇردەلى كەشەندى قۇرىلىس. سول كەشەندەگى قۇرىلىستىڭ سىرتىنداعى قابىرعالارىندا ءارتۇرلى جانۋارلاردىڭ, اسىرەسە جىلقىنىڭ سۋرەتتەرى كوپ بەينەلەنگەن. سونىمەن قاتار تۇيەنىڭ دە بەينەلەرى بار. قازبادان تابىلعان مالىمەتتەر, قىش ىدىستار, ايەل ادامنىڭ التىن سىرعاسى جانە تاعى باسقا اشەكەي بۇيىمدار وسى قولا ءداۋىرىنىڭ ۇلكەن كونە داۋىردە مادەنيەتى, وشاعى بولعاندىعىن كورسەتەدى», دەدى تاريحشى عالىم, ەۇۋ ارحەولوگيا جانە ەتنولوگيا كافەدراسىنىڭ مەڭگەرۋشىسى ۇلان ۇمىتقاليەۆ.
2014 جىلدان باستاپ ەۇۋ تاريح فاكۋلتەتى ارحەولوگيا جانە ەتنولوگيا كافەدراسىنىڭ عالىمدارى اباي وبلىسى, اباي اۋدانى توقتامىس ەلدى مەكەنىنىڭ جانىنداعى قىرىقۇڭگىر كەشەندى ەسكەرتكىشىندە ارحەولوگيالىق قازبا جۇمىستارىن جۇرگىزىپ كەلەدى. وعان ۋنيۆەرسيتەت ستۋدەنتتەرى مەن ماگيسترانتتارى اتسالىستى. جۇرگىزىلگەن زەرتتەۋ جۇمىستارىنىڭ ناتيجەسىندە ەۋرازيا دالاسىندا كەزدەسپەيتىن ءىرى كولەمدەگى ءبىزدىڭ داۋىرىمىزگە دەيىنگى ەكىنشى مىڭجىلدىقتىڭ باسى, ياعني وسىدان ءتورت مىڭ جىل بۇرىنعى قولا ءداۋىرىنىڭ دالا پيراميداسى تابىلدى.