Abu Dhabi Ports كومپانياسىمەن (Simatech Shipping & Forwarding اتىنداعى AD Ports Group بولىگى سانالادى) بىرلەسكەن كاسىپورىندى ىسكە قوسۋ قازاقستانعا پارسى شىعاناعى, تاياۋ شىعىس, پاكىستان, ءۇندىستان جانە شىعىس افريكا جاعالاۋىنداعى ەلدەر نارىقتارىنا ەلىمىزدەن ەكسپورتتالعان جۇكتەردى جەتكىزۋدىڭ ەڭ قىسقا تىكەلەي جولىن قۇرۋعا مۇمكىندىك بەرەدى.
ونى قۇرۋ پەرسپەكتيۆالارىن وتكەن اپتادا قازاقستان پرەمەر-ءمينيسترىنىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين جانە Simatech Shipping & Forwarding (ADP توبىنا كىرەدى) باسشىسى داۆۋد تافتي تالقىلادى.
نەگىزگى مىندەت – قازاقستانداعى قۇرىق پورتىنان پارسى شىعاناعى ەلدەرىنە ءامىراباد جانە بەندەر-ابباس (يران) پورتتارى ارقىلى اۋىل شارۋاشىلىعى تاۋارلارىن جەتكىزۋ. جاڭا باعىت وتاندىق ەكسپورتتاۋشىلارعا بۇرىن-سوڭدى بولماعان مۇمكىندىكتەر اشپاق: ءۇش كۇندە يران ارقىلى ءامىراباد, بەندەر-ابباس, بەندەر-حومەيني, چاباحار پورتتارىنا, ءباا-لىك حاليفا, فۋدجەيراعا جانە ءارى قاراي ءۇندىستان, پاكىستان, قيىر شىعىس, افريكانىڭ شىعىس جاعالاۋىنداعى بارلىق پورتقا جول اشادى. بۇل رەتتە باسقا تاۋارلاردى ەۋروپا ەلدەرىنە جەتكىزۋ مۇمكىندىگى دە قاراستىرىلۋدا.
كەزدەسۋ بارىسىندا تاراپتار ءارى قاراي پارسى شىعاناعى ەلدەرىنە ترانزيت جاساۋعا مۇمكىندىك بەرەتىن كاسپي تەڭىزى ارقىلى يران يسلام رەسپۋبليكاسىنا جۇكتەردى جەتكىزۋ مارشرۋتتارىنىڭ نۇسقالارىن تالقىلادى. Simatech Shipping & Forwarding كومپانياسىنىڭ CEO-سى داۆۋد ءتافتيدىڭ ايتۋىنشا, كومپانيا ارقايسىسى 7 500 توننا جۇك كوتەرەتىن 4 كەمە ساتىپ العان. كەمەلەردىڭ سۋداعى تەرەڭدىگى – 6 مەتر, ولار ءۇيىندى, كونتەينەرلىك, سونداي-اق نەگىزگى جۇكتەردى تاسىمالداۋعا قابىلەتتى. قازىرگى ۋاقىتتا كەمەلەر – ءامىراباد پورتىندا (يراننىڭ بەحشار وكرۋگىنىڭ سولتۇستىگىندە) ورنالاسقان. الداعى 2 جىل ىشىندە كومپانيا وسىنداي 10 كەمەنى جەتكىزۋدى جوسپارلاپ وتىر. سونداي-اق جاقىندا كومپانيا 45 جۇك كولىگىن جانە ارقايسىسى 350 جۇك كولىگىن تاسىمالداۋعا قابىلەتتى ەكى بارجانى ساتىپ الدى. الداعى 4 ايعا ارنالعان جوسپاردا جۇك اۆتوپاركىنىڭ سانىن 200-گە دەيىن, بولاشاقتا 1 000-عا دەيىن جەتكىزۋ تۇر.
قۇرىق (قازاقستان) جانە حاليفا ء(باا) بازالىق پورتتار بولادى. بۇل ەكى پورت بارلىق قاجەتتى ينفراقۇرىلىممەن جانە تەحنيكامەن قامتىلادى. سونداي-اق كومپانيانىڭ جۇكتەردى بىرىكتىرۋ جانە قايتا جيناۋ ءۇشىن ەكى قۇرعاق پورتى بار. مۇنىڭ ءبارى قازاقستاندىق ەكسپورتتاۋشىلارعا يراننان 2-3 كۇندە وتۋگە مۇمكىندىك بەرەدى.
ەسكە سالا كەتەيىك, 2023 جىلعى ءساۋىر ايىندا پرەمەر-ءمينيستردىڭ يرانعا ساپارى بارىسىندا قۇرىق پەن ءامىراباد پورتتارى اراسىنداعى تاسىمالداردى دامىتۋ تۋرالى كەلىسىمگە قول قويىلدى. قول جەتكىزىلگەن ۋاعدالاستىقتاردى ىسكە اسىرۋ اياسىندا وسى پورتتاردا استىق تەرمينالدارى ءۇشىن ينفراقۇرىلىم سالۋ جۇمىستارى اياقتالۋدا.
Simatech Shipping & Forwarding – پارسى شىعاناعىنداعى جەتەكشى كەمە باسقارۋشى كومپانيا. ونىڭ ۇلكەن فلوتى بار, يراننان اراب ەلدەرىنە, ءۇندىستان, افريكا جانە قىتايعا جۇك تاسىمالداۋمەن اينالىسادى. كومپانيانىڭ اراب ەلدەرىندە بىرقاتار كوممەرتسيالىق پورتى مەن تەرمينالى بار.