«جەرۇيىق كورەم دەسەڭ, كەگەنگە كەل!» دەپ اقىنىنا شابىت سىيلاعان سايالى مەكەننىڭ كوركىن اسىرىپ, اۋىلدىڭ اجارىن اشقان جاستار ساياباعىنا اعىلۋشىلار لەگى جاز بويى تولاستاماي تۇر.
سوناۋ 2016 جىلى ىرگەسى قالانعان ساياباقتىڭ قۇرىلىسى قۇلدىراپ, يگى ءىستىڭ اياقتالۋىن اۋىل تۇرعىندارى ۇزاق كۇتكەنى جاسىرىن ەمەس. سول سەبەپتى اۋدان ورتالىعىندا دەمالىپ, سايالايتىن مادەني ورىننىڭ جوقتىعىنا ءجيى شاعىمداناتىن.
– كەگەن اۋىلدىق وكرۋگى اكىمىنىڭ اپپاراتىنىڭ تەڭگەرىمىنە 76 ملن 329 مىڭ تەڭگە قالدىق قۇنىمەن قابىلدانعان ساياباقتى جوندەۋ, كۇتىپ, باپتاۋعا اۋىلدىق وكرۋگ اكىمىنىڭ باستاماسىمەن 2022 جىلى جالپى قۇنى 5 ملن 875 مىڭ تەڭگە قاراجات ءبولىنىپ, اشىق كونكۋرس جاريالانعان. ناتيجەسىندە, «دامۋ ەلكوم قۇرىلىس» جشس ساقالدى قۇرىلىستى قولعا الىپ, ساپالى جوندەۋ جۇمىستارىن جۇرگىزدى. وسى جىلى جاستار ساياباعى مەن رايىمبەك كوشەسىندە ورنالاسقان اللەياعا 500 مەتر جەرگە سۋ جەتكىزۋ مەن كۇتىپ-باپتاۋعا اشىق كونكۋرستى «م-مودۋل KZ» جشس (3 ملن 800 مىڭ تەڭگە) جەڭىپ الىپ, ساياباقتى كۇتىپ-باپتاۋ جۇمىستارىن جۇرگىزىپ جاتىر, – دەيدى كەگەن اۋىلدىق وكرۋگىنىڭ اكىمى رۋسلان ماسەنوۆ.
بيىلعى جازدا اۋىل جۇرتشىلىعى, اسىرەسە جاستار اتالعان ساياباقتان سايا تاۋىپ, كەشقۇرىم قىدىرىستاۋدى ادەتكە, ءتىپتى سانگە اينالدىرعان. ساياباقتىڭ شامدارى سامالاداي جارقىراپ, ويىن الاڭدارى بالالاردىڭ كۇمىس كۇلكىسىنە بولەنگەن. بالالاردىڭ قاۋىپسىزدىگى باستى نازارعا الىنىپ, ويىن الاڭدارىنداعى جاساندى توسەنىش جاسىل كىلەمدەي جايناپ, دەمالىس الاڭىن قۇلپىرتا تۇسكەن. مۇندا كوز جاۋىن الاتىن گۇلزار دا بار.
– اركىمگە تۋعان جەرى قۇت-مەكەن, التىن بەسىك قوي. اۋدان ورتالىعى سانالاتىن كەگەندەگى بەتكە ۇستار ساياباقتىڭ قانشاما جىل بويى قاراۋسىز قالىپ, ىشىنە مال جايىلىپ جۇرەتىنى جانىمىزعا باتاتىن. مىنە, جاناشىر, ىسكەر ازاماتتاردىڭ ارقاسىندا كوپتىڭ كوكەيىندە جۇرگەن بۇل پروبلەمانىڭ ءتۇيىنى تارقاتىلىپ, تۇگەلدەي جاسالىپ, قورشالىپ, جارىقتاندىرىلىپ, بالالار ءۇشىن باتۋتتار قويىلىپ, حالىققا قۋانىش سىيلادى. جاز بويى ۇيدەن ۇزامايتىن نەمەسە تاۋ-تاس كەزىپ كەتەتىن بالا-شاعانىڭ ءبارىن وسى ارادان كورەتىن بولدىق. وسىنداي مادەني وشاقتار كوپتەپ بوي كوتەرىپ, اۋىلىمىزدىڭ كوركى كىرسە, جاستاردىڭ دا قالاعا قاشپاي, تۇراقتاۋىنا سەبى تيەرى ءسوزسىز, – دەيدى كەگەن اۋىلداندىق اقساقالدار القاسىنىڭ توراعاسى سابىر دوسىمبەكوۆ.
«بىتەر ءىستىڭ باسىنا, جاقسى كەلەر قاسىنا» دەگەن. الاقانداي اۋىلدىڭ تىنىس-تىرشىلىگىنە, تۇيتكىلدى ماسەلەلەرىنە باسا نازار اۋدارعان اۋىل اكىمى رۋسلان كەڭەسجان ۇلى اۋدان ورتالىعىنداعى اتىحان ۇلى اتىنداعى كوشەدە ورنالاسقان, جارتى عاسىردان بەرى جوندەۋ كورمەي, توز-توزى شىققان ەكىقاباتتى تۇرعىن ءۇي تۇرعىندارىنىڭ سان جىلعى بازىناسىنا قۇلاق ءتۇرىپ, شاتىرىن جاڭالاپ, ءىشى-سىرتىن سىرلاپ, ءسويتىپ جىرتىعىنىڭ بۇتىندەلۋىنە مۇرىندىق بولعان.
– 1968 جىلى سالىنعان بۇل ۇيدە 24 وتباسى تۇراتىن ەدىك. سودان بەرى توزىپ, تۇگى قالماۋعا اينالعان. توبەدەن وتكەن جاڭبىر, تومەنگى قاباتقا سورعالايتىن. ءىشىن كوكتىڭ ءيىسى الىپ, كوپشىلىگى تۇرا الماي كوشىپ, پاتەر كەزىپ كەتتى. مۇڭ-زارىمىزدى قانشا جىلدان بەرى جىرلاپ كەلەمىز؟! ايتەۋىر ءۇنىمىزدى ەستيتىن ۇكىمەت بار ەكەن. اۋىل اكىمىنىڭ باسشىلىعىمەن بىلتىر تامىز ايىنان باستاپ ءبىزدىڭ تۇرعىن ۇيگە كۇردەلى جوندەۋ جۇمىستارى جاسالدى. باس-اياعى ەكى ايدىڭ ىشىندە قوسقاباتتى ءۇيىمىزدىڭ كوركى كىرىپ, كوز سۇيسىنەرلىك كۇيگە وزگەردى. تەندەردى ۇتىپ العان «كازستروي گرۋپپ»-تىڭ ىسكەر ازاماتتارىنا, بىلىكتى جۇمىسشىلارعا العىسىمىز شەكسىز. بۇگىندە ۇيگە كەلگەن قوناقتان ۇيالمايتىن بولدىق. ەڭسەمىز كوتەرىلىپ, شاڭىراعىمىز شۋاقتانىپ قالدى, – دەپ اعىنان جارىلدى وسى ءۇيدىڭ تۇرعىنى ءداريا عۇمىر.
كەگەن اۋىلىندا جالپى كوپقاباتتى تۇرعىن ۇيلەر سانى 14 بولسا, بيىل تاعى تورتەۋىنىڭ شاتىرلارى جاڭارتىلىپ, اعىمداعى جوندەۋ جۇمىستارى جالعاسۋدا. بۇل ماقساتقا 136 ملن تەڭگە قارجى بولىنگەن. جان جادىراتارلىق جاعىمدى ىستەردىڭ يگىلىگىن قاراپايىم حالىق كورىپ جاتىر.