جەرگە ءدان سەۋىپ, ەگىن وسىرگەن ەلدىڭ «باس اۋرۋىنىڭ» ءبىرى – ءارامشوپ. ەگىننەن بۇرىن بوي كوتەرىپ الاتىن ءارامشوپتىڭ جانى ءسىرى, تامىرى مىقتى. ونى ءتۇپ-تامىرىمەن جويماساڭ, ەگىنىڭنىڭ ەڭسە تىكتەپ, ءونىم بەرۋى ەكىتالاي. تاياۋدا «جاڭا دالا» حالىقارالىق اگروكورمەسىندە «ششەلكوۆو اگروحيم-KZ» كومپانياسىنىڭ عىلىمي قىزمەتكەرى جەكسەنبي قايىرجانوۆپەن كەزدەسىپ, كورمە تۋرالى جانە كومپانيانىڭ قىزمەتى جونىندە وي-پىكىرىن بىلدىك.
اتالعان كومپانيانىڭ كورمەدە قۇرعان پالاتكاسىنا اۋىل شارۋاشىلىعى ۆيتسە-ءمينيسترى رۇستەم قۇرمانوۆ پەن اقمولا وبلىسىنىڭ اكىمى ەرمەك مارجىقپاەۆ جانە كوپتەگەن اۋدان, اۋىل اكىمدەرى مەن ارنايى ماماندار ارنايى ات باسىن بۇرىپ, ءتۇرلى زيانكەس پەن ارام شوپكە قارسى ءدارى-دارمەك جاساپ كۇرەسۋشى قاۋىمنىڭ قىزمەتىمەن, سورەگە قويعان ونىمدەرىمەن ەگجەي-تەگجەي تانىستى. بۇل كومپانياعا ەگىن وسىرۋشىلەر تاراپىنان وسىنشاما قىزىعۋشىلىق پەن ىقىلاستى, ءىلتيپاتتى كورگەن ءبىز جۇرت اياعى باسىلعاندا ادەيىلەپ كەلىپ سالەم بەردىك. «ەگىس اراسىنداعى ارام شوپتەر مەن ەگىنگە زيان كەلتىرەتىن بارلىق تىرشىلىك يەسىنىڭ جان العىش ازىرەيىلى ءبىز بولامىز», دەپ ازىلدەدى عىلىمي كەڭەسشى.
«جاڭا دالا» كورمەسى اۋىل شارۋاشىلىعىنىڭ جاڭا تىنىسىن اشتى. اۋىل شارۋاشىلىعىندا ەڭبەك ەتىپ جۇرگەن بىرقاتار ەلدىڭ ماماندارى مەن عالىمدارىن, كاسىپكەرلەرى مەن ءتۇرلى كاسىپورىندارىنىڭ جاقىنداسۋىنا, قارىم-قاتىناسىن نىعايتۋىنا نەگىز بولدى. جيىرماعا جۋىق ەلدىڭ سالا ماماندارى مەن تەحنيكالارى, جاڭا تەحنولوگيالارى وسى كورمە الاڭىندا سىناقتان ءوتىپ, ءوز مۇمكىندىگىن كورسەتىپ, جاڭا تۇتىنۋشىسىن تاۋىپ جاتىر. مۇندا تەك ەگىس القابىندا جۇمىس ىستەيتىن تەحنيكالار عانا ەمەس, جەردەن ءوسىرىپ-وندىرىلگەن ءونىمنىڭ ءبارىن ادام الدىنا اس بولىپ بارعانعا دەيىن قولدانىلاتىن زاۋىت-فابريكالارعا كەرەك-جاراقتىڭ بارلىعى دەرلىك بار. اناۋ اسپاندا ۇشىپ جۇرگەن دروندار دا ەگىستىڭ يگىلىگى ءۇشىن كوكتىڭ ءجۇزىن ءسۇزىپ ءجۇر», دەدى ج.قايىرجانوۆ.
ونىڭ ايتۋىنا قاراعاندا, قۇرىلعانىنا 14 جىل بولعان اگروحيم كومپانياسى دا وسى «جاڭا دالا» كورمەسى ارقىلى جىل سايىن ءونىمىن وتاندىق جانە شەتەلدىك ديقاندارعا كەڭىنەن تانىستىرىپ, ەكى تاراپقا دا پايدا كەلتىرەتىن كەلىسىمدەرگە قول جەتكىزىپ ءجۇر ەكەن.
«ششەلكوۆو اگروحيم-KZ» كومپانياسى قۇرىلعان ءبىرىنشى كۇنىنەن باستاپ جۇمىس ىستەپ كەلە جاتىرمىن. ءبىر سوزبەن ايتقاندا, كومپانيانىڭ ىرگەتاسىن قالاۋشىلاردىڭ ءبىرىمىن. ءىستى باس ديرەكتورىمىز تاتيانا بولگوۆامەن بىرگە باستادىق. كومپانيانىڭ قۇرىلعانىنا كەلەسى جىلى 15 جىل بولادى. وسى ۋاقىت ارالىعىندا ۇلكەن تابىسقا جەتتىك. قازاقستانداعى بەلگىلى كومپانيالاردىڭ بىرىنە اينالىپ ۇلگەردىك. قازىر قازاقستان بويىنشا سالاداعى ءىرى ءۇش كومپانيانىڭ ءبىرى – «ششەلكوۆو اگروحيم-KZ» جشس», دەدى عالىم.
كومپانيانىڭ ورتالىق ءوفيسى استانادا بولعانىمەن, پاۆلودار, پەتروپاۆل, قوستاناي, كوكشەتاۋ, الماتى قالالارىندا بولىمشەلەرى بار ەكەن.
ء«بىز اۋىل شارۋاشىلىعىندا ەگىس اراسىنداعى ارامشوپتەرگە قارسى, ءتۇرلى اۋرۋعا قارسى, باسقا دا زيانكەستەردى جوياتىن ءدارى-دارمەك دايىندايمىز. كومپانيا نەگىزى رەسەي استاناسى ماسكەۋدىڭ جانىنداعى ششەلكوۆو دەگەن شاعىن قالادان باستاۋ الادى. نەگىزگى ءدارى-دارمەك پەن وعان كەرەك شيكىزاتتى سول قالادان الامىز. وعان قوسا وسى اقمولا وبلىسىنداعى ستەپنوگور قالاسىندا ءوزىمىزدىڭ «پروگرەسس-سەلحوز-حيم» دەگەن زاۋىتىمىز بار. شيكىزاتتى رەسەيدەن اكەلەمىز دە, اتالعان كاسىپورىندا قايتا وڭدەپ, اۋىل شارۋاشىلىعىنا كەرەكتى ءدارى-دارمەكتەردى جاساپ شىعارامىز», دەپ ءسوزىن جالعادى عىلىمي كەڭەسشى.
قازىرگى تاڭدا ەگىستەگى ارام شوپتەرمەن جانە ءتۇرلى اۋرۋ-كەسەلمەن كۇرەسىپ جۇرگەن كومپانيا قىزمەتكەرلەرى دروندارمەن جۇمىس ىستەۋدى مەڭگەرىپ ءجۇر ەكەن.
«سەبەبى قازىرگى جۇمىستاردىڭ نەگىزگىسى ءدارى شاشاتىن دروندارمەن اتقارىلادى. سول ءۇشىن عالىمدارىمىز, ماماندارىمىز ونى دا مەڭگەرىپ جاتىر. ال قازىرگى زاماناۋي جاس ماماندارىمىزدىڭ كوپشىلىگى ماگيستراتۋرانى بىتىرگەن. ارالارىندا PhD دوكتورلىعىن قورعاپ العاندارى دا بار. وسىنىڭ ءبارىن ەسكەرسەك, بىزدەگى قىزمەتكەرلەردىڭ جارتىسىنا جۋىعىنىڭ عىلىمي اتاعى بار دەسەك بولادى», دەپ ءسوزىن ءتۇيدى عالىم.