بالالارعا ارنالعان حورەوگرافيالىق قويىلىم قازىرگى قوعامداعى وزەكتى ماسەلەنىڭ ءبىرى – وسكەلەڭ ۇرپاقتىڭ گادجەتتەرگە تاۋەلدىلىگى تاقىرىبىن قوزعايدى. وسىنداي كۇردەلى تاقىرىپتى رەجيسسەرلەر مەن اۆتور قاراپايىم بي تىلىمەن جەتكىزگەن. سپەكتاكلدە كورسەتىلگەندەي, شىنايى ومىردە دە كوپتەگەن اتا-انا زامان اعىمىنا ەلىكتەپ, بالانىڭ ءسابي كەزىنەن باستاپ ۇلتتىق قۇندىلىقتارعا, ءتالىم-تاربيەگە قىزىعۋشىلىعىن وياتۋدىڭ ورنىنا, كوڭىلىن گادجەت بەرىپ تابادى. بۇل ارەكەتىنىڭ سوڭى نەمەن اياقتالۋى مۇمكىن ەكەنى ويىنا دا كىرىپ شىقپايدى.
بالالاردىڭ ساعاتتاپ عالامتور كەڭىستىگىندە وتىرۋىنىڭ دەنساۋلىعىنا وراسان زور زاردابى تيەتىنى بەلگىلى. بۇدان دا سوراقىسى – عالامتور جەلىسىندە بالانىڭ ءالى قاتپاعان پسيحيكاسىن بۇزاتىن ويىندار, بەينەروليكتەر, ترەندتەر قولجەتىمدى بولىپ, اتا-انانىڭ ورنىنا «تاربيە بەرىپ» جاتىر. مۇنىڭ تەك قانا سانا ۋلاۋ ەكەنى ايتپاسا دا تۇسىنىكتى.
سمارتفون ەكرانىنىڭ سىرتىندا وتىرعاندار بالالاردىڭ اڭقاۋلىعىن پايدالانىپ, ولاردى ءتۇرلى تىيىم سالىنعان ۇيىمدارعا, سەكتالارعا كىرگىزىپ, ميىن ۋلايدى. سەنىمىنە كىرىپ, قۇلدىققا, دونورلىققا ساتىپ جىبەرەتىن ۇيىمدار دا جەتىپ ارتىلادى. ولاردىڭ قارماعىنا ءار بالانىڭ ءتۇسۋ قاۋپى بار. ءتىپتى الەۋمەتتىك جەلىلەردەگى پەدوفيلدەردىڭ ءوزى قانشاما بالانىڭ, ءجاسوسپىرىمنىڭ جانىنا جازىلماس جارا سالىپ جاتىر. وكىنىشكە قاراي, ءبىزدىڭ قوعامدا بۇل زارداپتى ماسەلەنى ەشكىم قولىنا ناقتى الىپ, شەشۋگە تىرىسىپ جاتقان جوق. وسىلاي جالعاسا بەرسە, بۇل ماسەلە ءالى ۇزاق ۋاقىت بويى وزەكتى بولىپ قالا بەرەتىنى ءسوزسىز.
ال جوعارىدا ايتىلعان U SANA سپەكتاكلى ءسىزدىڭ بالاڭىزعا تەك جاقسى كوڭىل كۇي سىيلاپ قانا قويماي, ونىڭ جاقسى مەن جاماندى اجىراتۋىنا ىقپال ەتەدى. بالالار ۇلتتىق قۇندىلىقتاردى قاستەرلەۋدى ۇيرەنىپ, جەلىدە نەشە ءتۇرلى قاۋىپ-قاتەردىڭ بارىن ءبىلىپ شىعادى. ءوز بالاڭىزدىڭ تاربيەسىمەن ءدال وسى ساتتەن اينالىسا باستاڭىز. ايتپەسە تىم كەش قالۋىڭىز مۇمكىن.