قىتايدىڭ چەندۋ قالاسىندا ءوتىپ جاتقان جازعى ۋنيۆەرسيادانىڭ ءۇشىنشى جارىس كۇنىندە ەل قورجىنىنا العاشقى التىن مەدال ءتۇستى.
تاەكۆوندو سپورتىنان حالىقارالىق جارىستاردا ەل نامىسىن قورعاپ جۇرگەن 19 جاستاعى ريتا باكىشەۆا دۇنيەجۇزىلىك ۋنيۆەرسيادانىڭ جەڭىمپازى اتاندى. 46 كيلو سالماقتا ونەر كورسەتكەن وتانداسىمىز ىرىكتەۋ كەزەڭىندە قارسىلاستارىن وپ-وڭاي تىزە بۇكتىرىپ, فينالدا 2022 جىلعى الەم چەمپيوناتىنىڭ قولا جۇلدەگەرى قىتايلىق تايپەي وكىلى حۋان ين سۋانمەن شەبەرلىك بايقاستى. اسا تارتىستى وتكەن كەزدەسۋدە جەرلەسىمىز مىقتىلىعىن دالەلدەپ, ۋنيۆەرسيادانىڭ باس جۇلدەسىن ولجالادى.
سونداي-اق گيمناست ەلجانا تانيەۆا ەكى باعدارلاما بويىنشا ۇزدىكتەر قاتارىنان كورىندى. لەنتامەن جاتتىعۋ سايىسىندا باق سىناپ وتانداسىمىز ماجارستان مەن ۋكراينا قىزدارىنا جول بەرىپ, قولا جۇلدەگەر اتانسا, دوپپەن جەكەلەي سىنداعى جاتتىعۋدا تەك ماجارستان وكىلىن العا جىبەرىپ, كۇمىس مەدالدى موينىندا جارقىراتتى. قولا جۇلدە بولگاريا سپورتشىسىنا بۇيىردى. سونىمەن قاتار ساداق اتۋ سايىسىندا سىنعا تۇسكەن ديانا تۇرسىنبەك تە ەل قورجىنىنا كەزەكتى كۇمىس مەدالدى سالدى. ال دزيۋدوشى بەكارىس سادۋاقاس ستۋدەنتتەر باسەكەسىنىڭ قولا جۇلدەسىنە يە بولدى.
ەلىمىز قۇراماسى جالپىكوماندالىق ەسەپتە 1 التىن, 5 كۇمىس جانە 5 قولا مەدالمەن 10-ورىندا كەلەدى.