كوكشەتاۋ مەن اتباسار اراسىن جالعاپ جاتقان كۇرەجولدىڭ جاعدايى كوپتەن بەرى جۇرت اۋزىندا ءجۇر ەدى. وتكەن اپتادا ونى جوندەۋ جۇمىستارى باستالىپ كەتتى.
اتالعان جولدىڭ جالپى ۇزىندىعى 55 شاقىرىم بولادى. ول – زەرەندى اۋىلى مەن بالقاشىن ەلدى مەكەنىنە دەيىنگى ارالىق. بۇل جول زەرەندى مەن ساندىقتاۋ اۋداندارىن كوكتەپ وتەدى. ۋچاسكەدە 30-عا جۋىق ارنايى تەحنيكا مەن 50 مامان-قىزمەتكەرلەر جۇمىس ىستەپ جاتىر.
وسى جىلدىڭ قۇرىلىس ماۋسىمىندا «قاراعاندى – اياگوز – تارباعاتاي – بۇعاز» كۇرەجولىنىڭ جەتى ۋچاسكەسى جوندەۋ جۇمىستارىمەن قامتىلعانى ءمالىم. ولاردا جول جامىلعىلارى جاڭارتىلىپ, سۋ وتكىزگىش قۇبىرلار مەن جاڭا اۆتوپاۆيلوندار ورناتىلادى.
مىسالعا الىپ قاراساق, اباي وڭىرىندە جوندەۋ جۇمىستارىمەن اقسۋات پەن اششىسۋ اۋىلدارىنا جاقىن جەردەگى ەكى ۋچاسكە جانە اياگوز قالاسىنان شىعا بەرىستەگى جول قامتىلدى. ال قاراعاندى وبلىسىندا ماتاق اۋىلىنان قارقارالى قالاسىنا دەيىنگى ءتورت جول ۋچاسكەسىندە جول جوندەۋ جۇمىستارى قىزۋ جالعاسىپ جاتىر.