جۇرەككە ءامىر جۇرمەيتىنى راس قوي. بۇعان مىسال كوپ. سونىڭ ءبىرى – قازاق جىگىتى شەرحان مەن ورىس قىزى يۋليانانىڭ ماحابباتى.
يۋليانا نوۆيكوۆا جىلىوي اۋدانىنىڭ ورتالىعى – قۇلسارى قالاسىندا دۇنيەگە كەلگەن. وسىنداعى ورتا مەكتەپتى بىتىرگەن. بۇدان 12 جىل بۇرىن شاڭىراق كوتەرگەن جۇپتىڭ دوستىعى مەكتەپتە باستالعان. كەيىن ءبىر-بىرىنە ومىرلىك سەرىك بولۋعا ۋادەلەسكەن. قازىر ولار ەكى بالا تاربيەلەپ وتىر. قازاقتىڭ تابالدىرىعىنان يمەنبەي اتتاعان ورىس قىزى حالقىمىزدىڭ ۇلتتىق سالت-ءداستۇرىنىڭ ءبارىن ساقتايدى.
– ءبىز اتا-ەنەمىزبەن بىرگە تۇرامىز. ولار – قوناق كۇتكەندى جاقسى كورەتىن ادامدار. اتا-ەنەمە كۇن سايىن سالەم سالامىن. سالەم سالۋ – ۇلكەنگە قۇرمەتتىڭ بەلگىسى. ۇلكەننىڭ «باقىتتى بول, اينالايىن!», «قوساعىڭمەن قوسا اعار!» دەگەن باتالارى قابىل بولارىنا سەنەمىن. ءار باتانىڭ استارىندا جاستارعا, وتباسىعا جاقسىلىق تىلەۋ بار عوي. تەگىندە ۇلكەننەن باتا الۋ ارتىق ەتپەيدى. ويتكەنى وتباسىنداعى بەرەكەنى ارتتىراتىن ءداستۇردىڭ ءبىرى – باتا. سول سەبەپتەن ۇلكەندەردەن باتا الۋعا تىرىسامىز. اسىرەسە ناۋرىز مەيرامى, كورىسۋ كۇنىندەگى باتانىڭ ءجونى بولەك, – دەيدى يۋ.نوۆيكوۆا.
ونىڭ ايتۋىنشا, وتباسىندا بارلىق مەرەكەدە داستارقان جايىلىپ, قوناق كۇتەدى. ءوزى جەتى ءتۇرلى دامنەن ناۋرىز كوجە دايىنداعاندى, قازى اينالدىرعاندى, باۋىرساق ءپىسىرىپ, ەت اسۋدى ۇناتادى. مۇنىڭ ءبارىن ەنەسىنەن ۇيرەنىپ العان.
ول قازاق بالالارىمەن بىرگە ويناعان كەزىن ۇمىتپايدى. قازاقشانى سول كەزدەن بەرى بىلەدى. تەك قازاقشا سويلەۋدى مەڭگەرىپ قويماي, ۇلتتىق سالت-داستۇرگە قانىق بولىپ وسكەن. ونىڭ اناسى مەن اعاسى دا, اپكەلەرى دە قازاقشا سويلەيدى.
– قازاق اقىندارىنىڭ ولەڭدەرىن مانەرلەپ وقىعاندى ۇناتامىن. دالا دانىشپانى ابايدىڭ ءار ولەڭى مەن قارا سوزىنەن تاعىلىم الۋعا بولادى. قادىر مىرزا ءالىنىڭ «انا ءتىلىڭ – ارىڭ بۇل, ۇياتىڭ بوپ تۇر بەتتە. وزگە ءتىلدىڭ ءبارىن ءبىل, ءوز ءتىلىڭدى قۇرمەتتە!» دەگەنىندەي, قازاق ءتىلىن جەتىك بىلەمىن. مەن – قازاقستاندا تۋىپ-ءوستىم, وسى ەلدىڭ ازاماتىمىن. سول سەبەپتەن, ءوزىم تۇرىپ جاتقان ەلدىڭ مەملەكەتتىك ءتىلىن, تاريحى مەن مادەنيەتىن, سالت-ءداستۇرىن ەرەكشە قۇرمەتتەيمىن, – دەيدى قازاقتىڭ كەلىنى.
قازىر ول بالاباقشادا تاربيەشى بولىپ جۇمىس ىستەيدى. بالالارعا مەكتەپكە دەيىنگى تاربيە بەرۋمەن بىرگە ءتۇرلى سايىسقا ءجيى قاتىسادى. ءار سايىستان جۇلدەسىز قالعان ەمەس. وزگە ەتنوس وكىلدەرى اراسىندا وتكەن ء«تىل – پاراسات» وبلىستىق بايقاۋىنىڭ جەڭىمپازى اتانعان. سونداي-اق «اسىل انا» فورۋمىندا ءبىرىنشى ورىنعا يە بولعان.