قۇمدى جاعانى جايلاعان سارىبەل اۋىلىنىڭ ءبۇيىر تۇسىنداعى عاجايىپ سارقىرامانى بىلايعى ەلدى قويىپ, جەرگىلىكتى جۇرت تا بىلە بەرمەيدى ەكەن. بىلمەسە بىلمەيتىندەي, كوزگە كورىنبەيدى. سىزىلىپ اققان بۇلاق قازانشۇڭقىرعا قاراي قۇلاپ جاتىر. سارقىراۋى دا تالىپ ەستىلەدى. بىراق عاجاپ كورىنىس.
بىزگە سارىبەل سارقىراماسىن سامار اۋداندىق گازەتىنىڭ باسشىسى تاۋنار قايرات ۇلى كورسەتتى. اۋەلى جىلاپ اققان بۇلاقتى كورگەندە, توبىقتان اسپايدى عوي دەپ, مەنسىنبەگەن سىڭاي تانىتقانبىز. ءسال تومەن قۇلديلاپ ەدىك, سىزدىقتاي اقسا دا, گۇرىلى قۇلاق تۇندىرارداي. شۇڭقىرعا قاراي قۇلاپ جاتىر. ەتەگىندەگى كول ايناداي. كولدى قورشاپ جاتقان جاقپار تاستار قىزدىڭ جيعان جۇگىندەي ەكەن. مۇنداي اسەم تابيعاتتى كوپ ەشكىمنىڭ بىلمەي جۇرگەنى قالاي دەيمىز. ونىڭ ۇستىنە سارىبەلدىڭ سۋىنا ءتۇسىپ, قۇمىنا قىزدىرىنىپ كەتەتىن تۋريست كوپ. ءبىر جاعىنان بىلمەگەندەرى دە دۇرىس پا دەيمىز. ايتپەسە, ءار تالىنا اقتىق بايلاپ, ماڭايىن قوقىسقا تولتىرىپ كەتەر مە ەدى؟ ال قازىرگى سارقىرما ماڭى تاپ-تۇيناقتاي. تابيعي قالپى. وكىنىشتىسى, بۇل سۇلۋلىقتى تاماشالايتىن ۋاقىت شەكتەۋلى. تامىزعا قاراي سارقىراما سۋالىپ قالادى.
– «نەگىزى, بۇل – اۋىلدىڭ شەتىندەگى بۇلاق. كوكتەمدە سۋى مولايىپ, سارقىراما بولىپ اعادى. جازدىڭ ورتاسىنا قاراي سۋى ازايىپ كەتكەندە, سارقىراما دا توقتاپ قالادى. بىراق مۇنداعى كورىنىس كەرەمەت. ءوزىمىز سارىبەل سارقىراماسى دەپ اتاپ الدىق», – دەيدى تاۋنار قايرات ۇلى.
ايتقانداي, بۇقتىرما سۋ قويماسىنىڭ جاعاسىندا جاتقان سارىبەل اۋىلى ەرتەڭگى كۇنى ۇلكەن تۋريستىك مەكەنگە اينالۋى ابدەن مۇمكىن. جۇمباق سارقىراما دا تۋريستەردى تارتاتىن ورىنعا اينالار.