ەكىباستۇزدىڭ جىلۋ-ەلەكتر ستانساسىنداعى كۇردەلى جوندەۋ جۇمىستارى وبلىس باسشىلىعىنىڭ عانا ەمەس, ۇكىمەتتەگىلەردىڭ دە قاتاڭ قاداعالاۋىندا تۇرعانى ءمالىم. ورتالىقتاعى جابدىقتاردى جاماپ-جاسقاۋ شارالارىنا 250 ادام جۇمىلدىرىلعان. بۇگىندە ولار العاشقى كەزەڭگە جوسپارلانعان جوندەۋ جۇمىستارىنىڭ شامامەن 40 پايىزدايىن ەڭسەردى.
ەكىباستۇز جەو-داعى بەس بىردەي سۋ جىلىتقىش قازاندىقتارىن جوندەۋگە 200-دەن اسا ادام تارتىلعان. №11, 14 جانە 15 قازاندىقتاردى 20 قىركۇيەككە دەيىن قالپىنا كەلتىرۋ كوزدەلىپ وتىر. وزگە №12 جانە 13 قازاندىقتارىن جوندەۋ مەرزىمى ۇزاعىراق, 31 قازانعا دەيىن جالعاسادى. مەردىگەر «ساەم-پاۆلودار» جشس-ءنىڭ باس ديرەكتورى تيمۋر كالەندارەۆتىڭ ايتۋىنشا, اتالعان ءۇش قازاندىق بويىنشا تەكشە ىدىستار مەن پانەلدەردى مونتاجداۋ ءجۇرىپ جاتىر.
– العاشقى ءۇش قازاندىقتاعى جوندەۋ جۇمىستارىنىڭ 40 پايىزدان استامى ورىندالدى. جوندەۋ باستالاتىن تاعى ەكى قازاندىقتى جۋىپ, جابدىقتارىن بۇزۋ شارالارى باستالىپ كەتتى. قوندىرعىلاردا قالاتىن ەسكى قۇبىرلار تولىقتاي تەكسەرىلدى. رۇقسات شەگىندەگى نورمالار مەن پارامەترلەرگە سايكەس كەلسە, بۇرىنعى قۇبىرلار مەن قوسىمشا جابدىقتاردى ورنىندا قالدىرامىز, وزگەسىن جاڭاسىنا اۋىستىرامىز. جاڭا قۇبىرلاردى ارتىعىمەن الدىرعانبىز, سوندىقتان بارلىعىنا جەتكىلىكتى بولادى. وسى اپتادا ستانساعا ەكى جەلىلىك سورعى كەلەدى, ودان سوڭ تامىز ايىندا تاعى بىرەۋى كۇتىلۋدە, دەيدى ول.
ستانساداعى جەلىلىك قۇبىرلار دا جاڭارتىلادى. بۇل جۇمىستارعا شامامەن 30 ادام جاۋاپتى. ودان سوڭ ورتالىققا ەكراندى قۇبىرلار جەتكىزىلەدى. ماتەريال كەستەدەن كەشىكپەي جەتكىزىلسە, تامىز سوڭىنا دەيىن ولاردى تولىق دانەكەرلەپ شىعۋ كوزدەلىپ وتىر.
«سۋ جىلىتقىش قازاندىقتار بويىنشا ماسەلە جوق. تامىز ايىنان گيدراۆليكالىق سىناۋلاردى باستاپ كەتەمىز. مەردىگەر كومپانيالاردىڭ باسشىلارىمەن سويلەسە كەلە جوندەۋ شارالارىن ودان ءارى كۇشەيتۋ جونىندە كەلىستىك. ياعني جۇمىس كۇشى الداعى ۋاقىتتا تاعى دا كوبەيەدى. جىلىتۋ جۇيەسىنىڭ جوعارى قاباتىنداعى جۇمىستار اياقتالىپ قالعانى سەبەپتى بارلىق توراپتاردى قامتۋىمىز كەرەك. الداعى اپتانىڭ سوڭىنا دەيىن №11 قازاندىقتاعى كونۆەكتيۆتى پاكەتتەردى مونتاجداۋدى اياقتاۋ مىندەتى تۇر», دەپ قوستى ت.كالەندارەۆ.
گيدراۆليكالىق سىناۋلار 30 شىلدەگە دەيىن جالعاساتىنى سەبەپتى ەكىباستۇز قالاسىنىڭ بارلىق ۇيلەرى وسى اپتادا ىستىق سۋدان ۋاقىتشا اجىراتىلادى. بۇل ۋاقىتتا شاھاردىڭ ماگيسترالدىك جانە ورامىشىلىك جىلۋ جەلىلەرىندە قۇبىرلاردىڭ تىعىزدىعى مەن توزىمدىلىگى تەكسەرىلىپ, پايدا بولعان جارىقتار جامالادى. مەردىگەرلەر بارلىق جوسپارلى شارالار ۋاقىتىمەن اتقارىلىپ, قالا جۇرتشىلىعىنا جىلۋ كەستەدەن كەشىكپەي بەرىلەدى دەپ سەندىرىپ وتىر.