تەننيستەن الەمنىڭ ءۇشىنشى, ەلىمىزدىڭ ءبىرىنشى راكەتاسى ەلەنا رىباكينا 2023 جىلدىڭ العاشقى جارتى جىلىنىڭ قورىتىندىسى بويىنشا ەيس جاساۋ كورسەتكىشى بويىنشا ءبىرىنشى ورىندا تۇر.
بيىلعى ماۋسىم ەلەنا ءۇشىن اسا تابىستى ءوتىپ جاتىر دەۋگە بولادى. جىل باسىندا ول مەلبۋرندە وتكەن اۋستراليا اشىق بىرىنشىلىگىنىڭ فينالىنا دەيىن القىنباي جەتسە, ناۋرىز ايىندا ينديان-ۋەللستەگى اسا ءىرى حالىقارالىق تۋرنيردە توپ جاردى. ودان كەيىن ول ماياميدەگى تاعى ءبىر اسا ءىرى دودانىڭ فينالىندا باق سىنادى. ال جۋىردا عانا لوندوندا وتكەن «ۇلكەن دۋلىعا» ساناتىنداعى جارىستىڭ شيرەك فينالىنا دەيىن جەتتى. بۇل – تەننيس الەمىندەگى ەڭ ۇزدىك كورسەتكىشتەردىڭ ءبىرى سانالادى.
سونىمەن قاتار رىباكينانىڭ بۇدان بولەك تە اۋىز تولتىرىپ ايتارلىقتاي جەتىستىكتەرى بار. ماسەلەن, ول بيىل 44 ماتچتا كورتقا شىعىپ, 349 مارتە ەيس جاساعان ەكەن. ياعني بۇل دا بيىلعى تەننيس تاريحىنداعى ەڭ ۇزدىك كورسەتكىش رەتىندە تىركەلىپ وتىر. ەيس جاساۋ بويىنشا رەيتينگتە ەكىنشى ورىنعا فرانتسيالىق كارولينا گارسيا (305), ءۇشىنشى ساتىعا بەلارۋس وكىلى ارينا سوبولەنكو (275) جايعاسقان.