ادام ومىرىنەن قىمبات بايلىق جوق. بىراق سوڭعى كەزدە جولعا شىققان جولاۋشىنىڭ دىتتەگەن جەرىنە جەتكەنشە, يمانىن ءۇيىرىپ وتىراتىنى جاسىرىن ەمەس. وعان كولىك جۇرگىزۋشىلەرىنىڭ الداعى ماشينەنى باسىپ وزۋعا اسىعاتىنى سەبەپ بولىپ وتىر.
اتىراۋ وبلىستىق پوليتسيا دەپارتامەنتىنىڭ باستىعى نۇرحات ورازباەۆتىڭ مالىمەتىنشە, بيىلعى بەس ايدا مەرت بولعاندار سانى 8,8%-عا وسكەن. جول-كولىك وقيعالارىنىڭ دەنى جۇرگىزۋشىلەردىڭ جىلدامدىقتى شامادان تىس اسىرىپ, قارسى باعىتقا شىعۋىنان بولادى. رەسپۋبليكالىق ماڭىزى بار تاس جولداردا نورماتيۆكە سايكەس تاۋلىگىنە 3 500 اۆتوكولىك وتۋگە ءتيىس. قازىر بۇل كورسەتكىش 9 مىڭ اۆتوكولىككە جەتكەن. اۆتوكولىك اعىنىنىڭ 3 ەسەگە ارتقانى جول اپاتىنىڭ وسۋىنە اسەر ەتكەن.
قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى اتىراۋ وبلىستىق باسقارماسىنىڭ باستىعى عالىمجان قۇساننىڭ ايتۋىنشا, جول-كولىك وقيعاسىنىڭ سەبەبىن انىقتاۋ ءۇشىن ۇنەمى تالداۋ جۇرگىزىلەدى. ستاتيستيكالىق تالداۋعا سايكەس جول-كولىك وقيعاسىنىڭ 48 پايىزى اتىراۋ قالاسىندا تىركەلەتىنى انىقتالعان. جول اپاتىنىڭ 24 پايىزى اۆتوكولىكتەردىڭ سوقتىعىسۋىنا, 35 پايىزى جاياۋ جۇرگىنشىلەردى قاعۋ دەرەگىنە بايلانىستى بولعان.
«جول اپاتىنىڭ بارلىعى ادامي فاكتوردىڭ سالدارىنان بولاتىنى داۋ تۋدىرمايدى. بۇعان بىرنەشە سەبەپ بار. كولىك جۇرگىزۋشىلەرى ءوزىنىڭ نەمەسە وزگەنىڭ ءومىرىن ساقتاۋعا دەگەن جاۋاپكەرشىلىكتى سەزىنبەي, جىلدامدىقتى شامادان تىس اسىرادى. رۋلدە كەلە جاتىپ, ءموبيلدى تەلەفوندى قولدانادى. جولداعى مانەۆر جاساۋ تالاپتارىن بۇزادى. بالالاردى ارنايى قۇرىلعىسىز تاسىمالدايدى. ەڭ باستىسى, جولدا ءجۇرۋ ەرەجەسىنىڭ قاعيدالارىن ساقتاماۋدىڭ سالدارىنان اپاتقا ءجيى ۇشىرايدى», دەيدى پاترۋلدىك پوليتسيا روتاسىنىڭ كومانديرى, پوليتسيا كاپيتانى ادىلبەك شاحمەتوۆ.
ونىڭ ايتۋىنا قاراعاندا, ءوڭىر اۋماعىمەن وتەتىن رەسپۋبليكالىق ماڭىزى بار تاس جولداردا جىل باسىنان بەرى 38 جول-كولىك وقيعاسى تىركەلگەن. جول اپاتىنىڭ سالدارىنان 33 ادام مەرت بولىپ, 57 ادام ءارتۇرلى دەنە جاراقاتىن العان. سول سەبەپتەن, وسىنداي جولداردا كولىك اپاتىنىڭ الدىن الۋ ءۇشىن رەيدتىك ءىس-شارالاردى جۇرگىزۋ قولعا الىنعان. الايدا پوليتسيا تاراپىنان وسىنداي قاداعالاۋ بولاعىنان قاراماستان, جۇرگىزۋشىلەر باسىپ وزۋعا تىيىم سالىنعان جول بەلگىسىن ەلەمەيدى. ءسويتىپ, جىلدامدىقتى شەكتەن تىس اسىرىپ, الدىنداعى كولىكتەن وزۋ ءۇشىن جولدىڭ قارسى باعىتىنا شىعادى. جىل باسىنان بەرى تاس جولداردا جىلدامدىق رەجيمىن ساقتاماعان 12 809, باسىپ وزۋ ەرەجەسىن بۇزعان 611 جۇرگىزۋشى ۇستالعان. ماسەلەن, 18 ماۋسىمدا اتىراۋ-اقتوبە باعىتىنداعى تاس جولدا Lada Priora پەن Yutong اۆتوبۋسى سوقتىعىستى. جول اپاتىنىڭ سالدارىنان جەڭىل كولىكتەگى التى ادام ءجانتاسىلىم ەتتى. كوز جۇمعانداردىڭ اراسىندا 1985 جىلعى ايەل, 2013, 2016, 2019 جانە 2021 جىلعى بالالار بار. Lada Priora جەڭىل كولىگىنىڭ 1982 جىلعى جۇرگىزۋشىسى وبلىستىق اۋرۋحانادا العان دەنە جاراقاتتارى سالدارىنان ەسىن جيماي, كوز جۇمدى. مەرت بولعاندار ءبىر وتباسىنىڭ مۇشەلەرى – ەرلى-زايىپتى مەن ءتورت بالاسى.
جەڭىل كولىكپەن سوقتىعىسقان Yutong اۆتوبۋسى اتىراۋ قالاسىنان قىزىلقوعا اۋدانىنداعى ساعىز ستانساسىنا كۇن سايىن جولاۋشى تاسىمالداپ جۇرگەن قوعامدىق كولىك ەكەنى انىقتالدى. جول اپاتى بولعان ساتتە اۆتوبۋستا 26 جولاۋشى بولعان. ال 16 شىلدەدە جەتى ادامنىڭ ءومىرىن قيعان جول اپاتى دوسسور-قۇلسارى-بەينەۋ باعىتىنداعى تاس جولدىڭ 82-شاقىرىمى تۇسىندا تىركەلدى. باسىپ وزۋعا تىيىم سالىنعان جول بەلگىسىنىڭ ءدال جانىندا Chevrolet Cobalt ماركالى اۆتوكولىگىنىڭ رولىندەگى جۇرگىزۋشى قارسى جولاققا شىعىپ كەتكەن. ءسويتىپ, Toyota Ipsum كولىگىمەن سوقتىعىسقان. جول-كولىك وقيعاسىنىڭ سالدارىنان وقيعا ورنىندا جەتى ادام – جەڭىل كولىكتىڭ جۇرگىزۋشىسى مەن ءتورت جولاۋشىسى, Toyota Ipsum جۇرگىزۋشىسى مەن ءبىر جولاۋشىسى قازا تاپتى. جول اپاتىنا ۇشىراعان ەكى اۆتوكولىكتىڭ جۇرگىزۋشىسى دە بۇرىن بىرنەشە رەت جىلدامدىقتى شامادان تىس ارتتىرعانى ءۇشىن جاۋاپكەرشىلىككە تارتىلعانى انىقتالعان.