اباي وبلىسىندا بالاباقشا ەسەپشىسى 2,5 ملن تەڭگەدەن استام قارجىنى قالتاعا باسقان, دەپ حابارلايدى Egemen.kz.
اباي وبلىسىنا قاراستى جارما اۋدانىندا بالاباقشا ەسەپشىسى 2,5 ملن تەڭگەدەن استام قاراجاتتى وزىنە زاڭسىز اۋدارعان.
ەسەپشى مەكەمە باسشىسىنىڭ ەلەكتروندىق تسيفرلىق قولتاڭباسىنا قول جەتكىزە وتىرىپ, ونىڭ كومەگىمەن اقشالاي قاراجاتتى ەسەپتەۋ جانە اۋدارۋ بويىنشا بارلىق قارجىلىق وپەراتسيالاردى جۇزەگە اسىرىپ وتىرعان.
ول «Onlinebank HALYK» باعدارلاماسى ارقىلى جالعان ەلەكتروندىق تولەم شوتتارىن جاساعان. ايەل ءوزىنىڭ لاۋازىمىن اسىرا پايدالانىپ, 3 جىل بويى وسى ادىسپەن ءوز ەسەپشوتىنا اقشا اۋدارىپ جۇرگەن.
ناتيجەسىندە قىلمىستىق ارەكەتتەردىڭ سالدارىنان ەسەپشى بالاباقشاعا جالپى سوماسى 2,5 ملن تەڭگە كولەمىندە ماتەريالدىق شىعىن كەلتىردى.
ايتا كەتسەك, ەسەپشى ءوزىنىڭ كىناسىن تولىق مويىندادى جانە مەملەكەتكە كەلتىرگەن ماتەريالدىق زالالدى وتەدى. وسىلايشا سوت زاتتاي دالەلدەمەلەرگە سۇيەنە وتىرىپ, سوتتالۋشىنى كىنالى دەپ تانىپ, 2 جىل 6 اي باس بوستاندىعىنان ايىرۋ جانە ءومىر بويىنا مەملەكەتتىك قىزمەتتە قىزمەت ەتۋ قۇقىعىنان ايىرۋ تۇرىندە ۇكىم شىعاردى.
ايەلدىڭ 14 جاسقا تولماعان 3 بالاسى بار بولعاندىقتان قر قك-ءنىڭ 74-بابىنىڭ 1-بولىگىنە سايكەس, باس بوستاندىعىنان ايىرۋ تۇرىندەگى تاعايىندالعان جازانى ورىنداۋ 5 جىلعا كەيىنگە قالدىرىلدى.