ۇلتتىق مۋزەيدىڭ قورىندا بىزگە بەيمالىم جادىگەرلەر كوپ. تاريح كومبەسىنەن سىر شەرتەتىن ءتۇرلى بۇيىمدار ءار عاسىرداعى مادەنيەتكە جاتادى. ماسەلەن, سونىڭ ءبىرى – بارىس ءتيپتى بەلدىك اشەكەيى. ول ەسىك قورعانىنان تابىلعان. ءبىزدىڭ داۋىرىمىزگە دەيىنگى V- ءVى عاسىرلارعا جاتادى.
قارسى الدىندا جولبارىستىڭ سۋرەتى بار التىننان جاسالعان بۇيىم. وزەگىن بويلاي ارالىق ساڭىلاۋى بار تسيليندر ءپىشىندى. ۇزىندىعى 1,8 سم, ەنى 1,7 سم. شامامەن, كوستيۋمنىڭ بولشەكتەرىنە – باۋلاردى بىرىكتىرۋشىلەرگە جاتادى. قارسى الدىنداعى جانە ەكى بۇيىرىندەگى بەتى دوڭەس, باۋعا بەكىتىلگەن سىرتقى جاعى جايپاق. بۇيىمنىڭ قارسى الدىنداعى بەتىندە جولبارىستىڭ الدىڭعى اياقتارىنىڭ ۇستىندە جاتقان باسى, ەكى بۇيىرىندەگى بەتتەرىندە قاناتتارى بەينەلەنگەن. جولبارىستىڭ باسى بيىك بەدەرلەۋ ارقىلى جاسالعان. قاناتتارى دوعا ءتارىزدى, قيسىق سىزىقپەن كەسكىندەلگەن. قاناتتارىنىڭ شيىرشىقتارىندا تەگىستەگەن ىزدەر ساقتالعان. بۇيىم «بالاۋىزدى جويۋ» ادىسىمەن قۇيىلعان دەسەدى. بۇرىشتارى تەرەڭ ءارى جوعارى كوتەرىلگەن كەڭ اۋزى جولبارىستىڭ بەت الپەتىنە «كۇلگەن» كورىنىس بەرىپ تۇر. مۇنداي بەت الپەتى وسى كەشەندەگى باسقا دا اڭ ءتارىزدى بەينەلەرگە ءتان. تىزبە اشەكەيدىڭ جوعارعى جانە تومەنگى جيەكتەرى سىرتتاي قاراعاندا بۇدىرلانعان سياقتى بەدەرمەن جۇمىرلانىپ بەزەندىرىلگەن.